Nepalda narazylyq bildirýshiler úkimet ǵımarattaryn órtep jiberdi
ASTANA.KAZINFORM – Sherýge shyqqan júzdegen adam Katmandýdaǵy Nepal parlamentiniń ǵımaratyna basyp kirdi, ǵımarattyń bir qaptalynan tútin shyǵyp jatyr, dep habarlaıdy BBC.
Ǵımarat mańyn aınala mototsıklder júr, keıbireýleri baqshadan qazylǵan ósimdikterdi alyp ketip jatyr.
Ǵımarattyń kireberisinde narazylyq bildirýshiler ottyń aınalasynda bılep, urandatyp, kópshiligi Nepal týyn ustap tur.
Keıbir adamdar terezeleri synǵan ǵımarattyń ishine kirip ketken. Ǵımarattyń syrtqy qabyrǵalarynda graffıtı jáne úkimetke qarsy jazýlar jazylǵan.
Buǵan deıin sherýge shyqqandar el prezıdentiniń rezıdentsııasyna basyp kirip, órtep jibergen.
Ál-Jazıranyń habarlaýynsha, tanymal saıasatkerlerdiń úıleri de órtengen.
Narazylyq bildirýshiler Katmandýdaǵy eń iri Kantipur Publications medıa baspasy ornalasqan ǵımaratty da órtep jiberdi.
Protesters set fire to a building housing #Nepal’s largest media house in Kathmandu, as anti-corruption demonstrations led by Gen-Z continued for a second day on Tuesday.
— The Hindu (@the_hindu) September 9, 2025
Kantipur Publications, the publisher of Kantipur and The Kathmandu Post, is based in the building. The… pic.twitter.com/g3l7k0xkij
Aıta keteıik, Nepal premer-mınıstri Sharma Olı seısenbi kúni sybaılas jemqorlyqqa qarsy sherýshiler komendanttyq saǵatty buzyp, polıtsııamen qaqtyǵysqannan keıin otstavkaǵa ketken bolatyn.
Premer-mınıstrden bólek, ishki ister, aýyl sharýashylyǵy, jastar jáne sport, sý resýrstary mınıstrleri de otstavkaǵa ketti.
India Today agenttiginiń habarlaýynsha, premer-mınıstr men birqatar mınıstrler otstavkaǵa ketkennen keıin el tizginin Nepal armııasy óz qolyna aldy.
Buǵan deıin Joǵarǵy sot úkimetke álemde jáne Nepalda tanymal 26 áleýmettik jeli jeti kún ishinde Baılanys jáne aqparattyq tehnologııalar mınıstrliginde tirkelip, kontentti baqylaýǵa kelispese, olardy buǵattaýdy buıyrǵan. Bılik áleýmettik jelilerge qatysty sheshimin feıktermen, óshpendilikpen jáne jelidegi alaıaqtyqpen kúresý qajettiligimen túsindirdi.
Osydan keıin elde jappaı narazylyqtar bastalyp, tártipsizdikke ulasty. Narazylyq bildirýshilerdiń basym kópshiligi Z urpaǵy nemese 1995-2012 jyldar aralyǵynda týǵandar.
«Z urpaǵy tóńkerisi» Katmandý meri men sybaılas jemqorlyqpen kúresti qoldaýymen tanymal burynǵy reper Balen Shahty premer-mınıstr etip taǵaıyndaýdy talap etedi.
Úndistan Nepalmen shekarasynda joǵary dabyl rejımin jarııalady. Úndistannyń birneshe áýe kompanııalary Katmandý reısterin toqtatty.
Osyǵan deıin Nepalda narazylyq kezinde 14 adam qaza tapqany týraly jazdyq.