Nepalda mınıstrler tikushaqtarmen evakýatsııalandy

ASTANA. KAZINFORM – Nepalda osy aptanyń basynda bastalǵan jappaı narazylyqtar kezinde mınıstrler men olardyń otbasy múshelerin evakýatsııalaý úshin áskerı tikushaqtar jumyldyryldy, dep habarlaıdy Times of India.

Áleýmettik jelide tez taraǵan beınekadrlardan sheneýnikter jáne olardyń týystaryn áskerı tikushaqtarda qutqarý arqandarymen kóterip, narazylyq bildirýshiler jerden qarap turǵany kórinip tur.

Beınejazbada narazylyq bildirýshilerdiń Qarjy mınıstri jáne Syrtqy ister mınıstri Arzý Rana Deýba men onyń kúıeýi, burynǵy premer-mınıstr Sher Bahadýr Deýbaǵa shabýyl jasalǵan sáti túsip qalǵan. 

During the protests in Nepal, ministers were evacuated using ropes lowered from helicopters. pic.twitter.com/mavUWvvVgZ

— Clash Report (@clashreport) September 11, 2025

Eske sala ketsek, 8-9 qyrkúıek kúnderi bolǵan Nepalda narazylyq kezinde polıtsııanyń oq jaýdyrýy saldarynan 14 adam qaza tapty.

Sherýshiler úkimetten áleýmettik jelilerdi buǵattamaýdy jáne jemqorlyqpen kúresti kúsheıtýdi talap etti. Narazylyq bildirýshilerdiń basym kópshiligi — Z urpaǵy nemese 1995-2012 jyldar aralyǵynda týǵandar.

Nepal premer-mınıstri jappaı narazylyqtar tusynda otstavkaǵa ketti.

Nepaldyń Lalıtpýr qalasyndaǵy Nakhý túrmesinen 1 500-ge jýyq tutqyn qashyp ketti. 

Al eldiń áýejaılary 11 qyrkúıekke deıin jabyldy. 

Nepaldaǵy tártipsizdikterge baılanysty el armııasy keıbir qalalarda komendanttyq saǵatty 12 qyrkúıekke deıin uzartty. 

Nepal densaýlyq saqtaý mınıstrliginiń málimetinshe, tártipsizdikterden qaza tapqandar sany 51-ge jetip, 1 000-nan astamy jaralanǵan. Nepaldaǵy tártipsizdikter kezinde 15 myń adam túrmeden qashyp ketken.  

Qoǵamdyq ınfraqurylymǵa keltirilgen zalal 1,4 mlrd dollarǵa baǵalanyp otyr.

Narazylyqtarda sheshýshi ról atqarǵan Gen-Z qozǵalysy Nepal Joǵarǵy sotynyń burynǵy tóraǵasy Sýshıla Karkıdi ýaqytsha úkimet basshysy laýazymyna usynǵanyn jazǵan bolatynbyz.