Nepalda koronavırýs juqtyrǵan áıel aýrýhanaǵa alyp bara jatqanda qaıtys boldy
KATMANDÝ. QazAqparat – Nepalda senbi kúni koronavırýstan alǵashqy adam ólimi tirkeldi, dep habarlaıdy QazAqparat The Kathmandu Post-qa silteme jasap.
Nepaldyń densaýlyq saqtaý mınıstrligi jarııalaǵan málimdemege sáıkes, senbi kúni keshkisin koronavırýs juqtyrǵan áıel aýrýhanaǵa bara jatqan jolda kóz jumǵan. Ol osy eldegi Covid-19 alǵashqy qurbany boldy.
«Egjeı-tegjeıli tekserý men test nátıjeleri bunyń eldegi Covid-19-dan bolǵan alǵashqy ólim ekendigin dáleldep otyr», - delingen Densaýlyq saqtaý mınıstrligi resmı ókiliniń orynbasary Samır Kýmar Adhıkarıdiń málimdemesinde.
The Kathmandu Post habarlaýynsha, 29 jastaǵy áıel 6 mamyrda bosanyp, kelesi kúni jaǵdaıy jaqsy bolǵan soń perzenthanadan shyǵarylǵan. Úıine oralǵan soń qyzýy kóterilip, tynys alýy qıyndaǵan. Ony jergilikti medıtsına ortalyǵynda emdegen. Keıin jaǵdaıy nasharlap, aýrýhanaǵa alyp bara jatqan jolda kóz jumǵan. Naýqastyń aýrý belgileri Covid-19 uqsas bolǵandyqtan, aýrýhanada murny men tamaǵynan analız alǵan. Barlyq analızder oń nátıje kórsetken.
Senbi kúngi jaǵdaı boıynsha, Nepalda 281 adam koronavırýs juqtyryp, bir adam qaıtys boldy.
