Nepalda qar kóshkini kezinde qaza tapqan alpınısterdi izdeý jalǵasyp jatyr

ASTANA. KAZINFORM — Seven Summit Treks ekspedıtsııalyq agenttiginiń málimetinshe, Nepaldyń soltústik-shyǵysyndaǵy Gımalaı shyńynda qar kóshkini kezinde keminde jeti alpınıst, onyń ishinde bes sheteldik jáne eki nepaldyq azamat qaza tapty, dep habarlaıdy BBC. 

Qutqarýshylar eki adamnyń denesin tapty jáne shamalanǵandaı qar astynda kómilip qalǵan bes adamdy izdeý amaldaryn jalǵastyryp keledi. Taǵy segiz alpınıst qutqaryldy jáne el astanasy Katmandýda em alyp jatyr.

Aýdandyq polıtsııa bastyǵynyń aıtýynsha, barlyq alpınıst qar kóshkininen shamamen bir saǵat buryn taýǵa shyqqan bir toptyń quramynda bolǵan, dep habarlady BBC Nepali.

Seven Summit Treks kompanııasynyń tóraǵasy Mıngma Sherpanyń málimdeýinshe, qalǵan bes adamnyń denesi shamalanǵandaı qardyń 3-5 metr astynda jatýy múmkin. 
Qaza bolǵandar arasynda eki ıtalıalyq, bir kanadalyq, bir nemis, bir frantsýz azamaty jáne eki nepaldyq jol kórsetýshi bolǵany anyqtaldy.

Tiri qalǵan alpınısterdiń biri jergilikti gazetke zardap shekkender birneshe ret kómek suraǵanyn, biraq nátıje bolmaǵanyn aıtyp berdi. 

Aýdandyq polıtsııa komıssarynyń orynbasary Gıan Kýmar Mahato BBC-ge bergen suhbatynda qutqarý jumystaryna qolaısyz aýa raıy jaǵdaıy men logıstıkalyq qıyndyqtar kedergi keltirip jatqanyn, bul tikushaqtardyń ushýyna kedergi keltirip, oqıǵa ornyna jetýge múmkindik bolmaı jatqanyn aıtty.

Sonymen qatar Nepaldyń batysyndaǵy Panbarı taýyna shyǵý kezinde joǵalyp ketken taǵy eki ıtalıalyq alpınısti qutqarý jumystary jalǵasyp jatyr. Stefano Farronoto men Aleksandro Kapýto ótken aptada jolda qalyp qoıǵan úsh sheteldik jáne úsh jergilikti jol nusqaýshydan turatyn toptyń quramynda boldy.

Buǵan deıin qutqarýshylar Almaty taýlarynda adasqan eki jasóspirimdi tómenge túsirgenin jazǵan bolatynbyz.