Nepalda eki tikushaq soqtyǵysyp, sheteldik azamat qaza tapty
ASTANA. KAZINFORM — Nepalda Everest taýynyń mańynda eki tikushaq soqtyǵysyp, bir adam kóz jumdy, taǵy eki adam jaraqat aldy, dep habarlaıdy Kazinform agenttigi Al Jazeera basylymyna silteme jasap.
Oqys oqıǵa seısenbi kúni eki tikushaq Everest bazalyq lagerinen tómenirek ornalasqan alańǵa qonýǵa áreket jasaǵan kezde bolǵan. Apat teńiz deńgeıinen 4 myń metrden astam bıiktiktegi Perıche aýylynda tirkeldi.
Áleýmettik jelilerde tikushaqtardyń soqtyǵysqan sáti túsirilgen vıdeo tarady.
Bılik ókilderi Úndistannyń 47 jastaǵy azamaty qaza tapqanyn rastady. Jańa Zelandııa azamaty men nepaldyq ushqysh jaraqat alǵan. Al eki tikushaqta barlyǵy qansha adam bolǵany ázirge belgisiz.
Everest mańynda jol bolmaǵandyqtan, taýly aımaqta qatynaý qıyn. Aýrýǵa shaldyqqan nemese álsirep, joryǵyn jalǵastyra almaǵan týrıster men gıdterdi evakýatsııalaý úshin tikushaqtar jıi paıdalanylady.
Apat Nepalda týrıstik maýsym qyzǵan shaqta boldy. Bul kezeńde tikushaqtar óńirge týrıster men alpınısterdi jıi tasymaldaıdy.
Tikushaqtardyń soqtyǵysý sebebi ázirge belgisiz. Aldyn ala boljam boıynsha, áýejaıdyń dıspetcherlik munarasy qamtymaıtyn aımaqta ushqyshtar bir-biriniń áreketin durys túsinbegen bolýy múmkin.
Buǵan deıin AQSh-ta eki tikushaq soqtyǵysyp, úsh adam qaza tapqanyn habarlanǵanbyz.
