Nepalda 71 adam mingen ushaq apatqa ushyrady
ASTANA.QazAqparat - Nepal astanasy Katmandý qalasynda jolaýshylar ushaǵy apatqa ushyrady, dep habarlaıdy QazAqparat Sınhýa agenttigine silteme jasap.
Aqparat kóziniń málimetinshe, ushaq Bangladesh Respýblıkasynyń «US-Bangla» avıakompanııasyna tıesili. Bangladesh astanasy Dakkadan ushyp shyqqan áýe kemesi Katmandýdyń Trıbhývan halyqaralyq áýejaıyna qoný kezinde apatqa ushyraǵan. Onyń bortynda 67 jolaýshy men 4 ekıpaj múshesi bolǵan.
Jergilikti polıtsııa qyzmetiniń habarlaýynsha, apat saldarynan qaza bolǵandar sany 49 adamǵa jetip, jaraqat alǵandar aýrýhanaǵa jetkizildi. Sondaı-aq áýejaı jumysy ýaqytsha toqtatylyp, barlyq reıster keıinge qaldyryldy.
