Nepalda 6 814 metrlik Ama-Dablam shyńynan túsken nemis alpınısti qaza tapty
ASTANA. KAZINFORM — Nepaldyń soltústik-shyǵysynda ornalasqan Ama-Dablam shyńynan túsý kezinde nemis alpınısti qulap, qaza tapty. Bul týraly Reuters agenttigine silteme jasaǵan Report habarlady.
Real Himalaya Pvt Ltd týrıstik kompanııasynyń basshysy Gokýl Tapanyń aıtýynsha, alpınıst jeksenbi kúni bıiktigi 6 814 metr bolatyn Ama-Dablam shyńyna kóterilgen. Alaıda tómen túsý kezinde shamamen 1 500 metr bıiktikten qulap, dúısenbi kúni kóz jumǵan.
Kompanııa basshysynyń málimetinshe, alpınıstiń denesi taýdan shyǵarylyp, tikushaqpen Katmandýdaǵy aýrýhanaǵa jetkizilgen. Onda máıitke saraptama júrgiziledi.
Bıylǵy alpınızm maýsymynda, ıaǵnı qyrkúıek pen qarasha aralyǵynda, Ama-Dablam shyńyna shyǵýǵa 300-den astam alpınıst ruqsat alǵan.
Ama-Dablam — alpınıster arasynda tanymal taýlardyń biri. Ol Gımalaıdyń shyǵys bóligindegi Solýkhýmbý aýdanynda, Everest shyńynan nebári 20 shaqyrym jerde ornalasqan.
