Nepalda 22 saǵat boıy úıindiniń astynda jatqan sábı qutqaryldy - FOTO
ASTANA. QazAqparat - Nepalda qutqarýshylar 22 saǵat boıy qıraǵan úıdiń astynda jatqan 4 aılyq sábıdi alyp shyqty. Bul náresteniń tiri ekendigine eshkimniń de úmiti bolmaǵan, dep habarlady Bı-bı-sı.
Ol toǵyz jasar ápkesiniń qaraýynda úıde bolǵan. Jer silkinisi saldarynan senbi kúni olardyń úıleri qırap, qulaǵan.
Qyz úıden shyǵyp úlgerip, Sonıt Aval esimdi balany qutqarý úshin eresekterdi izdegen.
Sábıdiń daýysyn KathmanduToday.com saıtynda jumys isteıtin 26 jastaǵy fotograf Amýl Thapa estipti. Ol kómekke umtylady. Fotograftyń aıqaıyna sarbazdar kelip, úıindilerdi qopara bastaǵan. Alaıda sábıdi kelesi kúnniń tańerteńgi ýaqytynda ǵana alyp shyǵý múmkin boldy.
Jer silkinisi saldarynan Bhaktapýrdegi kóptegen eski úıler qırady. Turǵyndardyń kóbi baspanasyz qaldy.
