Nepalda 17 myńnan astam bala tabıǵı apat aımaǵynda qaldy

BUU zardap shekkenderge kómek kórsetý úshin resýrstaryn jumyldyrady

— Birikken Ulttar Uıymy qajetti resýrstar men gýmanıtarlyq toptardy jumyldyryp jatyr. Biz ulttyq bıliktiń shuǵyl kómek kórsetý jónindegi kúsh-jigerin qoldaýǵa mindettimiz, — dedi BUU Bas hatshysy Antonıý Gýterrısh.

BUU Bas hatshysynyń gýmanıtarlyq máseleler jónindegi orynbasary Tom Fletcher H áleýmettik jelisindegi paraqshasynda zardap shekkenderge kómek kórsetý úshin Tótenshe jaǵdaılarǵa den qoıý jónindegi ortalyq qordan alǵashqy 2 mıllıon dollar bólgenin málimdedi.

Sý tasqyny úılerdi, mektepter men aýrýhanalardy qıratty

— Rasýva men Dhadıngtegi balalar birneshe mınýttyń ishinde tasqyn sýdyń ózderi úırengen ómirdi qalaı shaıyp ketkenin kórdi. Úıler, mektepter men medıtsınalyq mekemeler qırady. Qaza tapqandardyń arasynda balalar da bar, kóptegen bala jaqyndarynan aıyryldy, — dedi ıÝNISEF-tiń Nepaldaǵy ókili Elıs Akýnga.

Onyń aıtýynsha, tabıǵı apattan aman qalǵan balalar endi túrli aýrýlarǵa, jetkiliksiz tamaqtanýǵa, zorlyq-zombylyq pen qanaýǵa ushyraý qaýpinde. ıÝNISEF zardap shekken aýdandarda jumys istep, kómek kólemin arttyryp jatyr. Alaıda uıymǵa shuǵyl túrde qosymsha resýrstar qajet. BUU Balalar qory osy maqsatqa 17,2 mıllıon dollar suratty.

Tutas aýdandar syrtqy álemnen oqshaýlandy

Joıqyn sý tasqyny birqatar eldi mekendi shaıyp ketip nemese syrtqy álemmen baılanysyn úzip tastady. Joldar, kópirler, sý elektr nysandary, sýmen jabdyqtaý jáne telekommýnıkatsııa júıeleri aıtarlyqtaı zaqymdandy.

Kóptegen aýdandarǵa jetý áli de qıyn. Bul ómirlik mańyzy bar kómekti jetkizýge kedergi keltirip otyr. Keminde tórt medıtsınalyq mekeme qatty zaqymdanyp, balalar men olardyń otbasylarynyń medıtsınalyq kómekke qoljetimdiligi shekteldi.

Myńdaǵan bala mektepsiz qaldy

Sý tasqyny 18 mektepti tolyǵymen qıratyp, taǵy 20 mektepke zaqym keltirdi. Ózen jaǵalaýlaryna jaqyn ornalasqan ondaǵan oqý orny áli de qaýip aldynda tur.

Sonyń saldarynan mektep jasyndaǵy shamamen 10 myń bala bilim berý salasynda shuǵyl qoldaýǵa muqtaj. Olar úshin ýaqytsha oqý ortalyqtaryn ashyp, oqý quraldarymen qamtamasyz etý qajet. Balalar men muǵalimderge psıhologııalyq kómek te kerek.

ıÝNISEF shuǵyl kómek kórsetip jatyr

Nepal Úkimeti jáne gýmanıtarlyq uıymdarmen birlesip, ıÝNISEF densaýlyq saqtaý, tamaqtaný, sýmen jabdyqtaý, sanıtarııa jáne gıgıena, sondaı-aq bilim berý, balalardy qorǵaý jáne áleýmettik qoldaý baǵyttaryndaǵy kómek jumystaryn keńeıtip jatyr.

Aldaǵy kúnderi zardap shekken aýdandarǵa medıtsınalyq shatyrlar, masadan qorǵaıtyn torlar, jańa týǵan nárestelerge arnalǵan jıyntyqtar jáne qatty ashyǵýdan zardap shekken balalarǵa arnalǵan emdik taǵam jetkiziledi. Myńdaǵan otbasy shuǵyl gıgıenalyq jıyntyqtarmen qamtamasyz etilip jatyr.

Sonymen qatar zardap shekken óńirlerge psıhologııalyq kómek kórsetetin mamandar toptary jiberildi. ıÝNISEF habar-osharsyz ketken nemese otbasynan ajyrap qalǵan balalardy anyqtap, tirkeýge de kómektesip jatyr.

Eske salaıyq, 26 tamyzda Nepal men Qytaı shekarasyna jaqyn aýmaqta kenetten bolǵan sý tasqyny saldarynan kóshkinder júrgen.

Buǵan deıin Nepaldaǵy tabıǵı apattan keıin Qazaqstannyń eki azamaty habar-osharsyz ketkeni habarlanǵan bolatyn.

Nepaldyń Tabıǵı apattar qaýpin azaıtý jáne onyń saldaryn joıý jónindegi ulttyq basqarmasynyń jańartylǵan málimetine sáıkes, eldegi tabıǵı apat saldarynan qaza tapqandar sany 538 adamǵa jetti. 977 adamnyń qaıda ekeni belgisiz. Habar-osharsyz ketkenderdiń arasynda 517 shetel azamaty bar.

Qytaıdyń shekaralas aýmaǵynda, QHR-dyń Sıtszan avtonomııalyq aýdanynda, Tótenshe jaǵdaılar basqarmasynyń málimetinshe, juma, 28 tamyz kúni saǵat 15:00–degi jaǵdaı boıynsha bes adam qaza tapqan. Taǵy 558 adam habar-osharsyz ketken, olardyń 260-y basqa memleketterdiń azamattary. 

Aıta ketelik Nepal-Qytaı shekarasynda sý tasqyny qurbandarynyń sany 500 adamǵa jaqyndady.