Nepalda Sýshıla Karkı ýaqytsha premer bolyp taǵaıyndalǵannan keıin shekteýler jeńildetildi
ASTANA. KAZINFORM — Nepalda áleýmettik jelilerdiń buǵattalýyna baılanysty ótken úkimetke qarsy narazylyqtardan keıin engizilgen shekteýler jeńildetile bastady, dep habarlaıdy Anadoly.
Bul qadam Nepaldaǵy ýaqytsha úkimettiń basshysy bolyp burynǵy Joǵarǵy sot tóraıymy Sýshıla Karkı taǵaıyndalǵannan keıin jasaldy.
The Kathmandu Post gazetiniń jazýynsha, Chıtvan men Ramechhap aýdandarynda, sondaı-aq astananyń basym bóligi — Katmandýda komendanttyq saǵat alyndy, sebebi qaýipsizdik jaǵdaıy turaqtalyp keledi. Alaıda el astanasynyń keıbir bólikterinde jıyndar men sherýlerge tyıym áli de saqtalyp otyr.
Ýaqytsha premer-mınıstr ant berdi
Keshe 73 jastaǵy Karkı ant qabyldap, alty aı ishinde eldi saılaýǵa jetkizý mandatymen ýaqytsha úkimetti basqarýdy qolǵa aldy. Ol Nepal tarıhyndaǵy alǵashqy áıel-premer atandy.
Nepaldaǵy narazylyqtar
4 qyrkúıekte el bıligi Facebook, Instagram, WhatsApp, YouTube, X, Reddit jáne LinkedIn jelilerine qoljetimdilikti shektedi. Bul sheshimdi olar ótinishterdiń Baılanys jáne aqparattyq tehnologııalar mınıstrligine ýaqytyly tirkelmeýimen túsindirdi.
Alaıda tyıym jappaı narazylyqtarǵa sebep boldy, oǵan negizinen jastar qatysty. Demonstranttar jemqorlyqqa jáne áleýmettik jelilerge shekteýge qarsy shyǵyp, parlament ǵımaratyna qaraı qozǵaldy. Polıtsııa olardy taratý úshin sýatqyshtar, kózden jas aǵyzatyn gaz jáne oq-dári qoldandy. Qaqtyǵys saldarynan 51 adam qaza taýyp, 1300-den astamy jaraqat aldy.
Úkimettiń áleýmettik jelilerdi buǵattaýdy alyp tastaý týraly ýádesine jáne Іshki ister mınıstri Ramesh Lekhaktyń, Aýyl sharýashylyǵy jáne mal sharýashylyǵy mınıstri Ramnat Adhıkarıdyń, Sý resýrstary mınıstri Pradıp ıAdavtyń otstavkaǵa ketýi týraly málimdemelerine qaramastan, narazylyq toqtaǵan joq. Sherýshiler saıasatkerler men mınıstrlerdiń úılerin órtep, Sanepa aýdanyndaǵy Nepal kongresiniń ortalyq keńsesine, federaldy parlament ǵımaratyna, Joǵarǵy sotqa jáne premer-mınıstr Khadga Prasad Sharma Olıdiń eki rezıdentsııasyna shabýyl jasady.
Áskerıler mınıstrlerdi úılerinen tikushaqpen evakýatsııalaýǵa májbúr boldy. 9 qyrkúıekte premer-mınıstr keńsesi Olıdiń otstavkaǵa ketkenin habarlady.
Búlikter barysynda narazylyq bildirýshiler túrmelerge de shabýyl jasap, ákimshilik ǵımarattardy órtedi jáne qaqpalardy ashyq qaldyrdy. Sonyń saldarynan 25-ten astam túzeý mekemesinen 15 myńnan astam tutqyn qashyp shyqty.