Nepal muzdyq kólderdiń tasý qaýpin azaıtýǵa 50 mln dollar jumsaıdy
ASTANA. KAZINFORM — Nepal bıligi joıqyn sý tasqyny qaýpin azaıtý úshin bıik taýly aımaqta ornalasqan tórt muzdyq kóldegi sý deńgeıin tómendetý jobasyn bastaıdy. Joba bıylǵy qarjy jylynda qolǵa alynbaq. Bul týraly Reuters agenttigine silteme jasaǵan Report habarlady.
Joba aıasynda Nepaldyń ortalyq jáne shyǵys bólikterinde, teńiz deńgeıinen 4 050–5 483 metr bıiktikte ornalasqan Thýlagı, Loýer-Barýn, Lýmdıng-Tsho jáne Hongý II kólderindegi sý deńgeıi tómendetiledi.
Memlekettik zertteý ortalyǵynyń sarapshysy Sýbash Týladhardyń aıtýynsha, sý arnaıy arnalar arqyly jaqyn mańdaǵy ózenderge baqylanatyn tártippen aǵyzylmaq. Bul tabıǵı bógetterdiń buzylý qaýpin jáne sonyń saldarynan bolatyn sý tasqynyn azaıtýǵa múmkindik beredi.
Jobalaý jumystary men egjeı-tegjeıli zertteýler 2027 jylǵy shildeniń ortasyna deıin jalǵasatyn qarjy jylynda bastalady. Al kólderdegi sý deńgeıin tikeleı tómendetý jumystary alty jylǵa deıin sozylýy múmkin.
Jobanyń quny 50 mıllıon dollarǵa baǵalanyp otyr. Ony Jasyl klımat qory, Birikken Ulttar Uıymynyń Damý baǵdarlamasy (BUUDB) jáne Nepal úkimeti qarjylandyrady.
Bul sheshim Qytaımen shekaralas aımaqta tamyz aıynda bolǵan apattan keıin qabyldandy. Sol kezde muzdyqtyń opyrylýy saldarynan kóshkin júrip, kenetten sý tasqyny bolǵan. Apat saldarynan 1,4 myńnan astam adam qaza taýyp, taǵy 5 myńnan astam adam habar-osharsyz ketkender qatarynda.
Aıta keteıik, buǵan deıin Nepaldaǵy sý tasqynynan qaza tapqandar sany 1294 adamǵa jetken bolatyn.
