Nepal men Tıbettegi alapat sý tasqynynan qaza tapqandar sany artty
ASTANA. KAZINFORM – Nepaldyń Tabıǵı apattar qaýpin azaıtý jáne basqarý jónindegi ulttyq basqarmasynyń málimetinshe, qaza tapqandar sany 579 adamǵa jetip, iz-túzsiz joǵalǵandar qatary 2 myńǵa jýyqtady. Bul týraly VVS jazdy.
Qytaıdyń memlekettik BAQ-tarynyń habarlaýynsha, Tıbette keminde bes adam qaza taýyp, taǵy 558 adam iz-túzsiz joǵalǵan.
Jergilikti bıliktiń málimetinshe, sársenbi kúni tasqyn sý shekaralyq aımaqty basyp, úıler men joldardy shaıyp ketken.
Qutqarýshylar apattan aman qalǵandarǵa jetý úshin ýaqytpen sanasýǵa týra kelip otyrǵanyn aıtady. Buǵan qosa, óńirde jańa sý tasqyny bolýy múmkin degen qaýip kúsheıdi.
Kóshkinge ne sebep boldy?
Alǵashqyda Nepal men Tıbet shekarasynda jer silkinisi bolǵany habarlanyp, kópshilik jerasty dúmpýleri kóshkinge, al ol óz kezeginde sársenbi kúni tańerteń joıqyn sý tasqynyna sebep boldy dep boljaǵan.
Alaıda keıin AQSh Geologııalyq qyzmeti (USGS) apatqa muzdyqtyń opyrylýy sebep bolǵanyn rastady. ıAǵnı alyp muzdyqtyń ózi nemese onyń bir bóligi buzylyp, opyrylyp túsken.
Vedomstvo málimetinshe, opyrylǵan muzdyqtyń ańǵar túbine soǵylǵandaǵy qýaty sonshalyq, odan magnıtýdasy 5,2 bolatyn seısmıkalyq dúmpý tirkelgen. Bul óz kezeginde ózenniń tómengi aǵysynda apatty saldarǵa ákelgen.
AQSh Geologııalyq qyzmetiniń habarlaýynsha, asa qýatty tasqyn sý men taý jynystary Trıshýlı jáne Bhote-Koshı ózenderiniń boıymen shamamen 100 shaqyrym tómen qaraı aǵyp, Nepaldyń soltústigindegi alpınıster men zııaratshylar arasynda tanymal eldi mekenderdi sý basqan.
Beınejazbalardan Nývakot aımaǵyndaǵy turǵyndar qaýipsiz jerge qashyp bara jatqanda, laı men tastan quralǵan alapat tasqynnyń ǵımarattardy, joldar men kólikterdi jaıpap ótkenin kórýge bolady.
Taǵy bir vıdeoda sý men laıdyń alyp tolqyny Trıshýlı ózeniniń boıyndaǵy shatqalmen tómen qaraı aǵyp, Rasývagadhı shekara beketin jáne Nepal jaǵyndaǵy kópqabatty ǵımaratty basyp qalǵany kórinedi.
Shekaranyń arǵy jaǵyndaǵy Gırong porty da zardap shekti. Tıbet aýyldarynda birneshe adamnyń qaza tapqany habarlandy.
Eske sala ketsek, buǵan deıin Nepalda 17 myńnan astam bala tabıǵı apat aımaǵynda qalǵanyn jazdyq.
