Nepal men Qytaıdaǵy sý tasqyny: joǵalǵandar sany kúrt kóbeıdi
ASTANA. KAZINFORM – Nepal men Qytaı shekarasy boıyndaǵy joıqyn sý tasqyny men kóshkinnen keıin iz-túzsiz joǵalǵandar sany 3 myńǵa jýyqtady. 680-nen astam adamnyń qaza tapqany belgili boldy, dep habarlaıdy Kyodo News.
Jergilikti bıliktiń senbi kúngi málimetinshe, sársenbide bolǵan tabıǵı apattan keıin izdeý-qutqarý jumystary jalǵasyp jatyr. Nepalda 2420-dan astam, Qytaıda 550-den astam adam iz-túzsiz joǵalǵandar qatarynda.
Sonymen qatar apat kezinde shekara mańynda paıda bolǵan tabıǵı bóget buzylyp, jańa sý tasqynyna ákelýi múmkin degen qaýip kúsheıip otyr.
Japonııa úkimetindegi derekkózder men Nepaldyń týrızm salasyndaǵy bılik ókilderiniń málimetinshe, Osaka prefektýrasynan kelgen ıAmamoto tekti bes adamnan turatyn otbasy da iz-túzsiz joǵalǵan. Olardyń arasynda jasy 40 shamasyndaǵy erli-zaıypty men kámeletke tolmaǵan úsh balasy bar. Otbasy Nepalǵa Qytaı jaǵynan kirgennen keıin baılanysqa shyqpaǵan.
Halyqaralyq Qyzyl Krest jáne Qyzyl Jarty Aı qoǵamdary federatsııasynyń málimetinshe, tabıǵı apattan shamamen 93 myń adam zardap shegip, kómekke muqtaj bolyp otyr.
Associated Press málimetinshe, otbasynan ajyrap qalǵan balalar evakýatsııalyq ortalyqtardy panalaǵan. BUU Balalar qory (ıÝNISEF) gýmanıtarlyq kómekke muqtaj balalar sanyn shamamen 17 myń dep baǵalap otyr.
Eske sala ketsek, buǵan deıin Nepaldaǵy sý tasqynynan 675 adam qaza taýyp, 2,5 myńǵa jýyq adam iz-túzsiz joǵalǵanyn jazdyq.
Sondaı-aq Qytaı-Nepal shekarasynda taǵy bir Qazaqstan azamatynyń izdestirilip jatqany belgili boldy.
