Nepal men Qytaı shekarasyndaǵy sý tasqynynan keıin 1500-den astam adamnyń taǵdyry belgisiz
ASTANA. KAZINFORM — Nepal men Qytaıdyń shekaralas aımaqtaryndaǵy jappaı sý tasqynynan kem degende 543 adam qurban bolyp, 1500-den astamy iz-túzsiz joǵalyp ketken, dep habarlaıdy Kazinform agenttiginiń Beıjińdegi menshikti tilshisi.
Nepaldyń Ulttyq apattar qaýpin azaıtý jáne basqarý basqarmasynyń jańartylǵan málimetine sáıkes, eldegi qaza tapqan adamdardyń sany 538-ge jetti. 977 adam iz-túzsiz joǵaldy, olardyń arasynda 517 sheteldik azamat bar.
Shekaranyń qytaılyq jaǵynda, QHR Sıtszıan avtonomııalyq aýdanynda Tótenshe jaǵdaılardy basqarý agenttigi juma kúni saǵat 15:00–degi jaǵdaı boıynsha bes adamnyń qurban bolǵanyn habarlady. Taǵy 558 adam iz-túzsiz joǵalyp ketken, sonyń ishinde 260 adam — shetel azamattary.
Qytaı Kommýnıstik partııasy (QKP) Ortalyq komıtetiniń Bas hatshysy Sı Tszınpın juma kúni QKP OK Saıası bıýrosynyń otyrysynda tóraǵalyq etti. Otyrys apatt barysynda selden keıin qutqarý jumystary men kómek kórsetý jospary talqylanyp, ázirlendi, dep habarlady memlekettik BAQ.
Buǵan deıin Kazinform Nepaldaǵy joıqyn sý tasqynyna Lhende ózeniniń arnasyn ýaqytsha bógep qalǵan muzdyq pen taý jynystarynyń opyrylýy sebep bolýy múmkin ekenin habarlaǵan edi. Tabıǵı bóget buzylǵannan keıin qýatty sý aǵyny ózenniń tómengi aǵysyna qaraı umtylǵan.
Osyǵan deıin Nepal-Qytaı shekarasynda sý tasqyny qurbandarynyń sany 500 adamǵa jaqyndaǵanyn jazdyq.
Sondaı-aq Qytaı-Nepal shekarasynda eki qazaqstandyq týrıst izdestirilip jatqany habarlandy.
