Nepal-Qytaı shekarasynda sý tasqyny qurbandarynyń sany 500 adamǵa jaqyndady
ASTANA. KAZINFORM — Nepalda kenetten bolǵan sý tasqyny men laı kóshkininen qaza tapqandar sany 469 adamǵa jetti, taǵy 977 adam iz-túzsiz jolǵaldy. Bılik málimetinshe, Qytaıda bes adam qaza bolyp, 500-den astamy iz-túzsiz joǵalyp ketti, dep habarlaıdy Kazinform agenttiginiń Beıjińdegi menshikti tilshisi.
Nepal polıtsııasynyń málimdemesine sáıkes, juma kúni tańerteńgi jaǵdaı boıynsha jaraqat alǵan 84 adam aýrýhanalarǵa jetkizildi. Іzdeý-qutqarý operatsııasyna 4300-den astam polıtsııa qyzmetkeri jumyldyryldy. Qazirgi ýaqytqa deıin 1545 adam qutqaryldy.
Túski ýaqytta polıtsııa sý tasqyny týraly eskertý jarııalap, turǵyndar men qutqarý jumystaryna qatysýshylardy qaýipsiz aımaqtarǵa kóshýge shaqyrdy.
CCTV málimetinshe, Nepal-Qytaı shekarasyndaǵy kóshkin saldarynan paıda bolǵan kól juma kúni arnasynan asyp, tası bastady. Tasqyn qaýpine baılanysty barlyq qytaılyq qutqarýshylarǵa qaýipsiz aımaqqa sheginýge buıryq berildi.
Qytaıdyń Sý resýrstary mınıstrliginiń habarlaýynsha, beısenbi kúngi jaǵdaı boıynsha kólde shamamen 2 mln tekshe metr sý bolǵan, aldaǵy úsh kúnde oǵan 3 mln tekshe metr sý quıylady — bul shamamen 1200 olımpıadalyq basseınge teń, al eń joǵary aǵyn 1 qyrkúıekte bolady dep shamalanyp otyr.
Nepal taýly aımaqtaǵy ondaǵan kópir men shaqyrym joldardyń qıraýyna baılanysty izdeý-qutqarý jumystary jalǵasyp jatqandyqtan qazirgi ýaqytta sheteldik kómekke muqtaj emes ekenin málimdedi.
Buǵan deıin Kazinform Nepaldaǵy joıqyn sý tasqynyna Lhende ózeniniń arnasyn ýaqytsha bógep qalǵan muzdyq pen taý jynystarynyń opyrylýy sebep bolýy múmkin ekenin habarlaǵan edi. Tabıǵı bóget buzylǵannan keıin qýatty sý aǵyny ózenniń tómengi aǵysyna qaraı umtylǵan.
Sondaı-aq sý tasqynynan keıin joǵalǵandar arasynda Qazaqstan azamaty baryn habarlaǵan bolatynbyz. Ol týrıstik top quramynda Nepaldan Qytaıǵa ótken. Qazaqstandyq dıplomattar onyń qaı jerde ekenin anyqtap jatyr.
27 tamyzda Nepal men Qytaı aýmaǵynda myńnan astam adamnyń iz-túzsiz joǵalǵanyn jazǵan edik. Sol kezde Qytaıdyń Sıtszan aımaǵynda 558 adam, onyń ishinde 260 sheteldik izdestirilip jatqan.
