Nepal gıdteri alpınısterdi ýlandyrdy degen kúdikke ilindi
ASTANA. KAZINFORM — Nepal polıtsııasy Everestke shyǵýmen baılanysty saqtandyrýdyń yqtımal alaıaqtyq shemasyn tergep jatyr, dep habarlaıdy AZERTADJ.
Tergeý málimetteri boıynsha jergilikti gıdter saqtandyrý kompanııalarynan úlken somadaǵy tólemderdi alý úshin tótenshe jaǵdaılardy qasaqana jasaǵan bolýy múmkin.
Jyl saıyn júzdegen adam álemniń eń bıik shyńyna shyǵý úshin kezekke turady. Tek Nepal jaǵynan shyǵýǵa ruqsattyń ózi 9 myń dollardan asady. Qosymsha shyǵyndarǵa qural-jabdyqtar, sapar, gıdterdiń qyzmeti jáne qajet bolǵan jaǵdaıda syrqattanǵanda nemese apat kezinde shuǵyl evakýatsııaǵa arnalǵan saqtandyrý kiredi.
Gıdter taýda ottegi jetispeýinen týyndaıtyn aýrýdyń belgilerin asyra siltep kórsetý arqyly klıentterdi qorqytýy múmkin. BAQ málimetteri boıynsha olardyń keıbiri alpınısterdiń taǵamyna bıkarbonatty ádeıi qosyp, jaǵdaıyn nasharlatýy yqtımal.
Bul qymbat evakýatsııalardy uıymdastyrýǵa, sodan keıin saqtandyrý tólemderin rásimdeýge múmkindik berdi.
Baǵalaýǵa qaraǵanda, quıtyrqy áreketke barǵandar 2022 jyldan bastap 20 mıllıon dollarǵa deıin tabys tapty degen boljam bar. Bılik 2018 jyldan beri bolýy múmkin uqsas jaǵdaılardy da tergep jatyr.
Osyǵan deıin Nepal bıligi Everestke shyǵýǵa lıtsenzııa berýdi toqtatatyny týraly jazǵan edik.
