Nepal Everestti qoqystan tazartýǵa arnalǵan «sátsiz» baǵdarlamany toqtatty

ASTANA. KAZINFORM — Everestten qoqysty tómenge túsirýge alpınısterdi yntalandyrýdy kózdegen baǵdarlama toqtatylady. Nepal bıligi VVS-ge bul bastamanyń sátsizdikke ushyraǵanyn málimdedi.

Baǵdarlamaǵa sáıkes, alpınıster 4 000 AQSh dollary (2 964 fýnt sterlıng) kóleminde kepildik jarna tóleýi tıis edi. Bul qarajat tek olar ózderimen birge Everestten tómenge keminde 8 keli qaldyq alyp túsken jaǵdaıda ǵana qaıtarylýy kerek edi.

Bılik ókilderi bul shara álemdegi eń bıik shyńdaǵy qoqys máselesin sheshýge bastama bolady dep úmittengen. Sarapshylardyń baǵalaýynsha, Everest shyńynda shamamen 50 tonnadaı qoqys jatyr.

Alaıda 11 jyl ótken soń, qoqys kólemi áli de artyp kele jatqanyna qaramastan baǵdarlama aıtarlyqtaı nátıje bermeı, orta jolda toqtatylyp otyr.

Týrızm departamentiniń dırektory Hımal Gaýtam VVS-ge bergen suhbatynda qoqys máselesi tek sheshilmeı qalǵan joq, sonymen qatar kepildik jarna júıesiniń ózi ákimshilik turǵydan aýyr júkke aınalǵanyn aıtty.

Týrızm mınıstrligi men alpınızm departamentiniń ókilderi VVS-ge sońǵy jyldary kepildik retinde jınalǵan qarajattyń basym bóligi alpınısterge qaıtarylǵanyn habarlady. Bul kópshiligi qoqysty tómenge túsirgenin bildirýi tıis edi.

Alaıda bul júıe sátsizdikke ushyrady dep eseptelip otyr. Sebebi alpınıster ákelgen qoqys bul másele eń kúrdeli bolyp otyrǵan joǵary lagerlerden emes, ádette, tómengi lagerlerden jınalǵan. 

«Bıik taýly lagerlerden adamdar kóbine tek ottegi ballondaryn alyp túsedi», dedi Everesttegi baqylaý-ótkizý pýnktin basqaratyn Sagarmatha qorshaǵan ortany lastaýdy baqylaý komıtetiniń bas dırektory Tsherıng Sherpa. «Al shatyrlar, konservi bankalary, oralǵan azyq-túlik pen sýsyndardyń qoraptary sııaqty basqa zattar negizinen sol jerde qalyp qoıady. Sondyqtan biz ol jaqta qoqystyń osynshama kóp jınalǵanyn kórip otyrmyz», dedi ol.

Sherpanyń aıtýynsha, alpınıst taýda akklımatızatsııa men shyńǵa shyǵý úshin shamamen alty aptaǵa deıin bolatyndyqtan, orta eseppen 12 kelige deıin qaldyq shyǵarady.

Aımaqtaǵy bılik ókilderi alpınısterden ózderi óndirgen qoqystan az mólsherde qaldyq ákelýdi talap etetin «qate erejeden» bólek, basty másele baqylaýdyń joqtyǵynda ekenin atap ótti.

«Khýmbý muzdy sarqyramasynyń ústindegi baqylaý-ótkizý pýnktinen basqa, alpınısterdiń is-áreketterin tekseretin eshqandaı baqylaý joq», dedi Tsherıng Sherpa.

Nepal bıligi endigi engiziletin jańa júıe burynǵysynan tıimdi bolady dep úmittenip otyr.

Aıta keteıik, Brıýsselde fermerler narazylyǵynan keıin 50 tonnadan astam qoqys shyǵaryldy.