Neo Nomad vızasyn eń kóp AQSh azamattary aldy
ASTANA. KAZINFORM – Qazaqstanda iske qosylǵan Neo Nomad vızasyn osy ýaqytqa deıin 19 eldiń 73 azamaty alǵan. Bul týraly Týrızm jáne sport mınıstrligi Kazinform agenttiginiń resmı saýalyna bergen jaýabynda habarlady.
Neo Nomad vızasy Qazaqstanda 2024 jylǵy qarashada iske qosyldy. Ol sheteldik kompanııada qashyqtan jumys isteıtin nemese sheteldegi tapsyrys berýshilerge qyzmet kórsetip, tabysyn basqa elden alatyn azamattarǵa arnalǵan.
Týrızm ındýstrııasy komıteti tóraǵasynyń orynbasary Aıdyn Qapashevtyń aıtýynsha, baǵdarlama iske qosylǵannan beri 19 memlekettiń azamattaryna barlyǵy 73 vıza berilgen.
– Qazaqstannyń Neo Nomad vızasyn alǵan sheteldikter arasynda AQSh azamattary kósh bastap tur. 2026 jylǵy maýsymnyń sońyna deıin amerıkalyqtarǵa 27 vıza rásimdelgen. AQSh-tan keıingi orynda Ulybrıtanııa tur. Bul eldiń 9 azamaty vızany rásimdegen. Kanada azamattaryna 8 vıza berildi, - dedi ol.
Sondaı-aq Neo Nomad vızasyn Avstralııa, Frantsııa, Koreıa Respýblıkasy, Germanııa, Irlandııa, Polsha, Latvııa jáne basqa da memleketterdiń azamattary alǵan.
– Vıza ıeleriniń naqty qandaı salada jumys isteıtini jóninde jeke esep júrgizilmeıdi. Degenmen bul múmkindik qyzmetin qashyqtan, ıaǵnı ınternet arqyly atqara alatyn mamandarǵa baǵyttalǵan. Olardyń qatarynda IT salasynyń qyzmetkerleri, keńesshiler, dızaınerler, marketologtar, kásipkerler jáne kreatıvti ındýstrııa ókilderi bar, -dedi komıtet tóraǵasynyń orynbasary.
Onyń sózinshe, baǵdarlamaǵa qyzyǵýshylyq birtindep artyp keledi. 2026 jyldyń alǵashqy alty aıynda 2025 jyldyń búkil jylyndaǵy kórsetkishpen birdeı kólemde vıza berilgen. Vedomstvo muny qashyqtan jumys isteý keń taraǵan elder azamattarynyń belsendiligimen baılanystyrady.
– Ásirese AQSh, Ulybrıtanııa jáne Kanada azamattary tarapynan suranys joǵary. Bul memleketterde ıkemdi jumys kestesi men keńseden tys eńbek etý tásili keńinen taralǵan, - dedi Aıdyn Qapyshev.
Aıta keteıik, Neo Nomad vızasy bir jylǵa deıin beriledi jáne bul onyń ıesine Qazaqstanǵa birneshe ret kirip-shyǵýǵa múmkindik beredi. Sheteldik maman osy ýaqyt ishinde Qazaqstanda turyp, basqa eldegi jumys berýshide eńbek etýin jalǵastyra alady.
Qazirgi ýaqytta Qazaqstanǵa tartylatyn tsıfrlyq kóshpendiler sany boıynsha naqty jospar belgilenbegen. Baǵdarlamany qoldaný tájirıbesi jınaqtalǵannan keıin onyń tıimdiligine taldaý jasalatyn bolady.
Aıta keteıik, ınvestorlyq jáne Neo Nomad vızalaryna suranys artqany jóninde materıal jarııalanǵan edi.
