Neo Nomad vızasy: Qazaqstan tsıfrlyq kóshpendilerdi nesimen qyzyqtyrady
ASTANA. KAZINFORM – Sapaly ınternet, qaýipsiz orta, ómir súrý qunynyń tómendigi jáne tabıǵı oryndardyń alýan túrliligi Qazaqstandy tsıfrlyq kóshpendiler úshin tartymdy baǵyttardyń birine aınaldyryp otyr. Bul týraly Týrızm jáne sport mınıstrligi Kazinform agenttiginiń resmı saýalyna bergen jaýabynda habarlady.
Týrızm ındýstrııasy komıteti tóraǵasynyń orynbasary Aıdyn Qapashevtyń aıtýynsha, Qazaqstanda turý jáne kúndelikti qyzmetterdi paıdalaný quny birqatar sheteldik memleketpen salystyrǵanda qoljetimdi.
– Bul uzaq merzimge keletin mamandarǵa baspana jaldaý, kólikpen júrý jáne kúndelikti qajettilikterge jumsalatyn shyǵyndy azaıtýǵa múmkindik beredi. Sondaı-aq tsıfrlyq kóshpendiler úshin ınternet sapasy da mańyzdy. Qazaqstanda tsıfrlyq jáne qalalyq ınfraqurylym qalyptasqan, al iri qalalarda qashyqtan jumys isteýge qajet baılanys pen qyzmetter qoljetimdi, - dedi ol.
Sonymen qatar ol sheteldik mamandar elde qaýipsiz jaǵdaıda turyp, jumysyn jalǵastyra alatynyn da eske salyp ótti.
– Neo Nomad vızasynyń ıeleri Qazaqstanda bir jylǵa deıin bolyp, osy aralyqta elge birneshe ret kirip-shyǵýǵa quqyly. Olar Qazaqstanda júrgenimen, sheteldik jumys berýshide jumys isteýin nemese sheteldegi tapsyrys berýshilerge qyzmet kórsetýin jalǵastyra beredi, - dedi Aıdyn Qapyshev.
Sondaı-aq ol tabıǵı jáne týrıstik oryndardyń kóptigi de baǵdarlamanyń artyqshylyqtarynyń biri sanalatynyn atap ótti. Tsıfrlyq kóshpendiler jumystan bos ýaqytynda taýly aımaqtarǵa, ulttyq parkterge, kólder men kýrorttyq óńirlerge saıahattaı alady. Osylaısha olar jumys pen saıahatty qatar alyp júrýge múmkindik alady.
– Neo Nomad vızasy týraly aqparat shetelde birneshe arna arqyly taratylady. Ony Syrtqy ister mınıstrligi Qazaqstannyń basqa memleketterdegi elshilikteri men konsýldyqtary arqyly nasıhattaıdy. Týrızm salasyna jaýapty mınıstrlik te eldiń týrıstik múmkindikterin tanystyrý kezinde osy baǵdarlama týraly málimet beredi. Vızaǵa qatysty aqparat resmı ınternet-resýrstarda jarııalanyp, sheteldik naryqtardaǵy aýdıtorııaǵa jetkiziledi. Qashyqtan jumys isteý keń taraǵan AQSh, Ulybrıtanııa jáne Kanada azamattarynyń qyzyǵýshylyǵy joǵary ekeni baıqalady, - dedi komıtet tóraǵasynyń orynbasary.
Ol baǵdarlama jaqynda iske qosylǵandyqtan, ázirge ony túbegeıli ózgertý josparlanbaǵanyn atap ótti. Aldymen vızany qoldaný tájirıbesi zerttelip, qoldanystaǵy tetiktiń tıimdiligi baǵalanady.
– Taldaý nátıjesine qaraı baǵdarlamany jetildirý, sheteldegi aqparattyq jumysty kúsheıtý jáne Neo Nomad vızasynyń tanymaldyǵyn arttyrý máseleleri qaralýy múmkin. Alaıda aldaǵy jyldary Qazaqstanǵa qansha tsıfrlyq kóshpendini tartý kózdelip otyrǵany jóninde naqty nysanaly kórsetkish ázirge bekitilgen joq, - dedi ol.
Aıta keteıik, Neo Nomad vızasy Qazaqstanda 2024 jylǵy qarashada iske qosyldy. Ol sheteldik kompanııada qashyqtan jumys isteıtin nemese sheteldegi tapsyrys berýshilerge qyzmet kórsetip, tabysyn basqa elden alatyn azamattarǵa arnalǵan.
Búginge deıin Neo Nomad vızasyn 19 eldiń 73 azamaty alǵan.
