Qazaqstannyń kóshpeli vızasyn alǵandar salyqty qalaı tóleıdi

ALMATY. KAZINFORM — Bul suraqqa Memlekettik kirister komıteti jaýap berdi.

Qazaqstan 2024 jyldyń 18 qarashasynan Neo Nomad vızasyn iske qosty.

Ol sheteldik týrısterge óz kompanııasynda qashyqtan jumys isteı otyryp, Qazaqstanda bir jylǵa deıin turýǵa jol ashady.

Qazirgi ýaqytta Sıngapýr, Ońtústik Koreıa, Ulybrıtanııa, AQSh, Portýgalııa jáne ózge de memleketterdiń azamattaryna 11 vıza berilgen.

Neo Nomad vızasynyń ıegeri ulybrıtanııalyq Sertach Iener agenttikke habarlasyp, tsıfrlyq kóshpendiler qanshalyqty salyq tóleýge mindetti ekenin surady.

Biz bul saýaldy Memlekettik kirister komıtetine joldadyq.

— Salyq kodeksine sáıkes, jeke tulǵa el aýmaǵynda 12 aı merzimniń ishinde 183 ne odan kóp kún bolsa, rezıdent dep tanylady. Rezıdentter Qazaqstanda da, shetelde de alynǵan kirisinen jeke tabys salyǵyn derbes tóleýge mindetti. Eger kiris sheteldik kózden alynsa, rastaıtyn qujattary bolǵan kezde shetelde tólengen uqsas salyqty esepke jatqyzý múmkindigimen 10% mólsherleme boıynsha salyq tólenedi, — delingen komıtet jaýabynda.

Sonymen qatar elimizde rezıdent sanalatyn tulǵalar eseptelgen jyldan keıingi jyldyń 15-shi qyrkúıegine deıin 270.00 nysan boıynsha deklaratsııa tapsyrýǵa, osy kúnnen keıin 10 kún ishinde salyq tóleýge mindetti.

— Osylaısha, eger Neo Nomad vızasynyń ıesi salyq rezıdenti bolsa (kún sany boıynsha), ol kirisin deklaratsııalaýǵa jáne salyq tóleýge mindetti, — dep habarlady komıtetten.

Eske salaıyq, buǵan deıin Neo Nomad vızasynyń alǵashqy ıegeri ulybrıtanııalyq Sertach Ienermen suhbat jaryq kórgen edi.