Nemisterdiń jartysyna jýyǵy jumysyn aýystyrýdy oılap júr

ASTANA. KAZINFORM – Statista júrgizgen saýalnama nátıjesine sáıkes, qyzmetkerlerdiń 44%-y aldaǵy bir jyl ishinde jumystan ketý múmkindigin qarastyryp júr. 18 ben 24 jas aralyǵyndaǵy respondentter arasynda bul kórsetkish 54%-ǵa jetken, dep habarlaıdy DW. 

Negizgi narazylyq sebebi shamadan tys jumys júktemesi. Saýalnamaǵa qatysqandardyń 43%-y aptasyna birneshe ret artyq jumys isteıtinin moıyndasa, 12%-dan astamy kún saıyn qosymsha jumys isteıtinin aıtqan. Qatysýshylardyń 63%-y tez sharshaıtynyn, 58%-y jeke ómirinde qıyndyqtar paıda bolǵanyn, 56%-y jıi emotsıonaldy kúızeliske ushyraıtynyn habarlaǵan. Qyzmetkerlerdiń úshten birinen astamy uıqysynyń nasharlaǵanyn atap ótken.

Keıbiri ýaqytsha amaldar izdeıdi: jumys ornynda shamadan tys júktemeni talqylaý, jospardan tys demalys nemese eńbekke jaramsyzdyq paraǵyn alý, tipti belsendi jumys istep jatqandaı túr kórsetý. Degenmen, kópshiligi úshin jalǵyz naqty sheshim jumystan ketý bolyp otyr.

Sonymen qatar Germanııa turǵyndary jan basyna shaqqandaǵy jumys saǵatynyń rekordyn ornatqan. Vısbadendegi Federaldyq demografııalyq zertteýler ınstıtýtynyń dereginshe, 20 men 64 jas aralyǵyndaǵy árbir Germanııa turǵyny aptasyna orta eseppen 29 saǵat jumys isteıdi. Bul – eldiń qaıta birigýinen bergi eń joǵary kórsetkish. Esepke jumyssyzdar da, ıaǵnı nóldik saǵat kórsetkender de engizilgen. 

Aıta ketelik Germanııada jumyssyzdar sany úsh mıllıonnan asty.