Nemis sýretshisi Gerhard Rıhter tórt kartınasyn qaıyrymdylyqqa berdi

ASTANA. KAZINFORM – Zamanaýı ónerdiń eń yqpaldy ókilderiniń biri, nemis sýretshisi Gerhard Rıhter qaıyrymdylyq aýktsıonyna tórt jańa kartınasyn usyndy. Bul týraly jergilikti DW habarlady.

Sýretshi týyndylardy jeke ózi tabystaǵan. Aýktsıonnan túsken qarajat Housing First jobasyna baǵyttalady. Atalǵan bastama baspanasyz adamdardy turaqty turǵyn úımen qamtamasyz etýdi kózdeıdi.

Uıymdastyrýshylar jınalǵan qarjy jańa páter satyp alýǵa jetkilikti bolady dep otyr. Ár kartınanyń bastapqy baǵasy 20 000 eýrodan bastalady.

Sýretshi Dıýsseldorfta bilim alyp, osy qalada shyǵarmashylyq jolyn bastaǵan. Ol uzaq jyldar boıy jergilikti qaıyrymdylyq uıymyn qoldap keledi. 2015 jyly óziniń 30 abstraktili kartınasyn tolyqtaı qaıyrymdylyqqa berip, árqaısysy 80 000-130 000 eýro aralyǵynda satylǵan. Bul qarajat uıymnyń turǵyn úı qoryn qalyptastyrýǵa negiz bolǵan.

«Housing First» jobasy baspanasyzdyqtan shyǵýdyń basty sharty – aldymen adamǵa turaqty baspana berý degen qaǵıdatqa súıenedi. Keıin áleýmettik jáne kásibı qoldaý kórsetiledi.

Uıymdastyrýshylar aýktsıon tek qarjy jınaýdy ǵana emes, sonymen qatar qoǵam nazaryn baspanasyzdyq máselesine aýdarýdy maqsat etetinin atap ótti.

2013 jyly Gerhard Rıhterdiń jumysy 37 mıllıon dollarǵa satylǵany habarlandy.