Nemis polıtsııasy QR azamatshasy Aıgúl Saılybaevanyń ólimine qatysty túsinik berdi
ASTANA. KAZINFORM – Germanııanyń Ońtústik Gessen polıtsııasynyń Bas basqarmasy Qazaqstan azamatshasy Aıgúl Saılybaevanyń ólimine qatysty suraqqa jaýap berdi.
«16 maýsym kúni tústen keıin Erlah kóliniń mańynda adam denesi tabylǵannan keıin prokýratýra men polıtsııa bul 2024 jylǵy 4 maýsymda iz-túzsiz joǵalǵan 40 jastaǵy áıeldiń denesi dep boljap otyr», - dep jaýap berdi Ońtústik Gessen polıtsııasy Bas basqarmasy.
Osy ýaqytqa deıin júrgizilgen tergeý jumystarynyń nátıjesinde áıel zorlyq-zombylyq qurbany bolǵany belgili boldy.
Qylmysqa ne sebep bolǵany belgisiz.
Qosymsha tergeý úshin Ońtústik Gessen polıtsııasynyń Bas basqarmasy «Erlahe» kisi óltirý bólimin qurdy. Tergeý amaldaryna 35-ten astam sheneýnik tartyldy.
Adam denesi tabylǵan aýmaqta qosymsha izdestirý jumystary júrgizilmek. Tergeýshiler qylmys máıit tabylǵan jerde jasalmaǵan dep boljap otyr.
Tergeýshiler kisi óltirýdi tergeýmen qatar, iz-túzsiz joǵalǵan Aıgúldiń qaıyn enesin, 49 jastaǵy áıeldi izdeý amaldaryn jalǵastyryp jatyr. Olardyń ornalasqan jerin anyqtalyp jatyr.
Eki áıeldiń joǵalyp ketýi men kisi óltirý arasyndaǵy baılanystyń qanshalyqty yqtımal ekeni ázirge belgisiz jáne tergelip jatyr.
«Erlahe» kisi óltirý bólimi halyqtan aqparat alý úshin jeke telefon jelisin qurdy: 06151/969 53200, azamattar esimderin atamaı aqparat berý úshin osy nómirge habarlasa alady. Qazirgi ýaqytta tergeýshiler 4 maýsymnan beri qylmysqa qatysy bolýy múmkin kýágerlerdi izdestirip jatyr. Tergeý júrgizilip jatqandyqtan, ázirge osy baspasóz habarlamasynan basqa aqparat berý múmkin emes. Baspasózben jumys isteý Darmshtadt prokýratýrasynyń quzyretine jatady», - dep jaýap berdi Ońtústik Gessen polıtsııasy.
Eske sala ketsek, Germanııada eks-sýdıa Aıgúl Saılybaevanyń zorlyq belgileri bar máıiti tabylǵanyn jazǵan bolatynbyz.
Syrtqy ister mınıstrliginiń resmı ókili Aıbek Smadııarov vedomstvonyń baspasóz máslıhatynda Germanııada joǵalǵan Qazaqstan azamatynyń týystary Germanııaǵa jetkenin málim etti.
Burynǵy sýdıanyń joǵalǵany týraly onyń aǵasy Qanat Saılybaev habarlady.
Materıaldyń aǵylshyn tilindegi nusqasyn osy jerden oqýǵa bolady.
