Nemis kompanııalary qashyqtan jumys isteý múmkindigin keńeıtpek

ASTANA. KAZINFORM — Germanııada aqparattyq tehnologııalar salasyndaǵy kompanııalardyń 80%-y jáne ónerkásiptik óńdeý salasyndaǵy ár ekinshi kompanııa óz qyzmetkerlerine aptasyna keminde bir kún úıden jumys isteýge múmkindik beredi, dep jazdy DW.

Bul týraly Mangeım qalasyndaǵy Eýropalyq ekonomıkalyq zertteýler ortalyǵynyń (ZEW) zertteýinde aıtylǵan.

Hoým-ofıs formaty eń aldymen 100 adamnan astam qyzmetkeri bar fırmalarda keń taralǵan.

Aldaǵy eki jyl ishinde nemis kompanııalarynyń shamamen úshten biri úıden jumys isteý múmkindigin keńeıtýdi jáne qashyqtan jumys isteıtin qyzmetkerlerdiń sanyn arttyrýdy josparlap otyr. Degenmen, shamamen 10% kompanııa mundaı múmkindikterdi qysqartqysy nemese múldem joıýdy kózdeıdi.

Sonymen qatar, keıbir kompanııalar qashyqtan jumystyń múmkin bolatyn teris áserlerine de nazar aýdarady, mysaly, bul ónimdilikke jáne komandalyq ózara árekettestikke keri áser etýi múmkin.

Degenmen, saýalnamaǵa qatysqan kompanııalardyń jartysynan astamy aralas (gıbrıdti) jumys formatynyń bilikti mamandardy tartýǵa oń áser etkenin atap ótti.

Al Tokıoda bala týý kórsetkishin arttyrý úshin tórt kúndik jumys aptasy engizilgenin jazǵan edik.