Nemis kınology: Qazaqy tazy – ańshylyq ıttiń minsiz úlgisi
ASTANA. KAZINFORM – Italııanyń Bolonıa qalasynda ótip jatqan World Dog Show-2026 halyqaralyq kórmesinde Qazaqstannyń ulttyq stendi mamandar men qonaqtardyń erekshe nazaryn aýdardy, dep habarlaıdy Kazinform agenttiginiń Eýropadaǵy menshikti tilshisi.
Dástúrli kıiz úı úlgisinde bezendirilgen alańda qazaq halqynyń maqtanyshy – tazy tuqymy tanystyryldy.
Qazaqy tazy týraly óz pikirin álemdegi bedeldi sarapshylardyń biri, Germanııa kınologtar odaǵynyń (VDH) prezıdenti Peter Frıdrıh bildirdi.
– Meniń tazyǵa erekshe yqylasym bar ekenin kópshilik biledi jáne oǵan negiz bolatyn sebepter jetkilikti. Men úshin tazy – eń aldymen óte sulý ıt. Biraq onyń qundylyǵy tek syrtqy kelbetinde emes. Bul tuqym tolyqqandy belsendi ómir súre alady, ańshylyqqa tamasha beıimdelgen, qozǵalys bıomehanıkasy men symbaty erekshe. Sonymen qatar minezi de óte jaqsy. Men unatatyn ıtterdiń dál osyndaı túri, al tazy – sonyń minsiz úlgisi, – dedi Peter Frıdrıh.
Sarapshy halyqaralyq kınologııalyq qaýymdastyqtyń nazaryn aýdaryp otyrǵan qazaqy tazynyń basty erekshelikterine de toqtaldy.
– Men eki negizgi qasıetti atar edim. Birinshisi – onyń tańǵalarlyq sabyrlylyǵy. Tazy óte tynysh ári baısaldy bola alady. Biraq qajet bolǵan sátte bir mezette asa qýatty ańshylyq belsendilikke kóshedi. Ekinshiden, ańshylyqtan keıin qaıtadan tez tynyshtalyp, meıirimdi ári áleýmettengen qalpyna oralady. Osyndaı qasıetterdiń úılesimi kınologııa áleminde óte joǵary baǵalanady, – dedi ol.
Mamandardyń pikirinshe, World Dog Show sııaqty bedeldi halyqaralyq kórmelerge qatysý qazaqy tazynyń álemdik deńgeıde tolyq moıyndalýyna jol ashady.
Aıta keteıik, Halyqaralyq kınologııa federatsııasy (FCI) qazaqy tazy tuqymynyń standartyna ıelik etý quqyǵyn resmı túrde Qazaqstanǵa bekitip bergen bolatyn. Osydan keıin álem chempıonattarynda tazyny tanystyrý men nasıhattaý jumystary jańa deńgeıge kóterildi.
Buǵan deıin Bolonıada ótken álem chempıonatynda qazaqstandyq «Chelsı» atty tazy jas ıtter arasyndaǵy tazy tuqymdastar tobynda tórtinshi oryn aldy.
