Nemis qarjy banki 2026 jyly krıptovalıýtany saqtaý servısin iske qospaq

ASTANA. KAZINFORM – Nemis qarjy alyby — Deutsche Bank 2026 jyly óz krıptoaktıvterdi saqtaý servısin iske qosýdy josparlap otyr, dep jazdy AZƏRTAC.

Bloomberg agenttiginiń málimetine saı, bul bastamany júzege asyrýǵa krıptobırja Bitpanda-nyń tehnologııalyq bólimshesi — Bitpanda Technology Solutions qatysyp jatyr. Sonymen qatar bank tsıfrlyq aktıvtermen jumys isteýge mamandanǵan Shveıtsarııalyq Taurus SA kompanııasymen yntymaqtastyqty jalǵastyrady.

Bloomberg-tiń habarlaýynsha, Deutsche Bank tsıfrlyq aktıvterdi saqtaý salasyna qyzyǵýshylyǵyn alǵash ret 2022 jyly bildirgen. Sol ýaqyttan beri bank krıptovalıýtalardy óz qarjylyq qyzmetterine biriktirý múmkindikterin belsendi zerttep keledi.

Bank sonymen qatar tokenızatsııalanǵan depozıtterdi paıdalaný stsenarıılerin, steıblkoınderdi qoldaný, ózine tıesili token shyǵarý, ne bolmasa salaaralyq bastamalarǵa qosylý múmkindikterin qarastyryp jatyr, delingen habarlamada.

Aıta keteıik, 2024 jyldyń sońynda Deutsche Bank bankterdiń jarııa blokcheındermen ózara árekettesýinde kezdesetin retteýshi kedergilerdi eńserýge baǵyttalǵan pılottyq jobany iske qosqan bolatyn.

Eske sala keteıik, buǵan deıin Frantsııa, Ispanııa jáne Ulybrıtanııany sharpyǵan aptap ystyq Germanııaǵa jetkenin jazǵan edik. Sınoptıkterdiń boljamynsha, shildeniń 2-si kúni temperatýra sharyqtaý shegine jetip, Germanııanyń ońtústiginde 40°C shamasynda, al eldiń basqa óńirlerinde 35°C jáne odan joǵary bolady dep boljanǵan.