Nemis fýtbolshylarynyń qyzǵylt jeıdesiniń satylymy rekord jańartty
ASTANA. KAZINFORM – Fýtboldan Germanııanyń qyzǵylt jeıdesi ulttyq qurama tarıhyndaǵy eń kóp satylǵan jeıde retinde tirkeldi.
Áý basta jeıdede memlekettik týdaǵy tústerdiń joqtyǵy jergilikti jankúıerlerdi eleń etkizgen edi. Tipti, kez kelgen komandanyń syrt alańda kıetin jeıdelerinde bolatyn jasyl tústiń bolmaýy da túsinbeýshilik týdyrǵan bolatyn. Dese de, Germanııa fýtbol qaýymdastyǵy bul jeıde tanystyrylǵan sátten bastap Eýropa chempıonaty bastalǵanǵa deıin tarıhtaǵy eń kóp satylǵan jeıdelerdiń rekordyn jańartqanyn rastap otyr.
Bıyl naýryzda jeıdeniń tanystyrylymy kezinde Germanııa fýtbol qaýymdastyǵy basshylyǵy: «Bul jeıde nemis jankúıerleriniń jańa «urpaǵyna» arnalǵan jáne Germanııanyń ártúrliligin kórsetedi», degen edi.
Eýro-2024 dodasy Germanııa quramasynyń tehnıkalyq demeýshisi bolyp tabylatyn Adidas ujymynyń sońǵy jarysy ekenin atap ótken jón. 2027 jyldan bastap Nike nemisterdiń jańa demeýshisi bolady. Sáıkesinshe, jeıde de ózgerýi múmkin.
Germanııa quramasy Adidas jeıdelerimen úsh álem chempıonatynda jáne eki Eýropa chempıonatynda jeńiske jetti. Kompanııa 1954 jyldan beri Germanııa quramasynyń resmı tehnıkalyq demeýshisi.
Esterińizge salsaq,buǵan deıin Adidas Germanııa fýtbol komandasynyń formasyndaǵy 44 nómirinen bas tartqan bolatyn.
