Nemis ekonomısi zeınetkerler úshin mindetti «áleýmettik jyl» engizýdi usyndy

ASTANA. KAZINFORM — Zeınetke shyqqan soń, taǵy bir jyl qoǵamdyq paıdaly ispen aınalysý — osyndaı bastamany Nemis ekonomıkalyq zertteýler ınstıtýtynyń prezıdenti Marsel Fratssher usyndy. Germanııada mundaı júıe qazir de bar, biraq tek jastar úshin jáne erikti túrde júzege asady, dep jazdy DW.

«Áleýmettik jyl» dep atalatyn bul júıede adamdar qaıyrymdylyq nemese áleýmettik baǵyttaǵy uıymdarda jumys isteıdi. Bul úshin tolyq jalaqy emes, tek shaǵyn ótemaqy beriledi.

Fratssher osy júıeni zeınetkerlerge de engizýdi usyndy. Onyń aıtýynsha, bul bastama densaýlyq saqtaý, kútim, qorǵanys sııaqty salalarda kadr tapshylyǵyn sheshýge kómekteser edi. Mysaly, Býndesverge (Germanııa Qarýly kúshteri) tehnıkalyq bilimi bar mamandar qajet. Sonymen qatar, bul jastarǵa túsetin áleýmettik-ekonomıkalyq aýyrtpalyqty azaıtýy múmkin.

Spiegel jýrnalyna bergen suhbatynda ekonomıst bebı-býmerler (1950-jyldardyń ortasynan 1960-jyldardyń sońyna deıin týǵandar) urpaǵynyń balasy az bolǵanyn atap ótti.

Alaıda bul usynys qoǵamda narazylyq týdyrdy. Germanııanyń áleýmettik uıymy (SoVD) bul pikirdi synǵa aldy. Uıym jetekshisi Mıhaela Engelmaıer:

– Mıllıondaǵan adam tórt baladan bas tartý týraly sheshimdi, sonyń ishinde qarjylyq sebeptermen qabyldady. Al endi olarǵa qartaıǵanda qoǵamdyq jumys túrinde «jaza» usyný – bul qurmetsizdik, – dedi.

Sondaı-aq Germanııa kásipodaqtar qaýymdastyǵy da bul ıdeıaǵa qarsy shyǵyp:

– Ondaǵan jyl jumys istegen adamdar zeınetaqysyn tolyqqandy alýǵa laıyq, – dep málimdedi.

Aıta keteıik, Germanııanyń medıtsınasy daǵdarys aldynda ekenin jazǵan edik.