Nemis dárigerleri Erbaıan Muhtardyń aıaǵynan turýyna 80-85% úmit artyp otyr

ASTANA. KAZINFORM – Birneshe aı komada jatyp, esin jıǵan sarbaz Erbaıan Muhtardy Germanııaǵa aparyp emdeıdi. Bul týraly múgedek bolyp qalǵan jigittiń ákesi Hamıt Aımaǵambetov málim etti.

«Balamdy emdetý úshin klınıkany Germanııadan tańdap otyrmyz, biraq qandaı klınıka, qaıda aparamyz ashyq aıtqymyz kelmeıdi, aqparatty barǵan soń taratamyz. Germanııanyń myqty degen 2-3 klınıkasy qabyldaımyz dep otyr, búgin Densaýlyq saqtaý mınıstrimen kezdesýde balany jetkizý jaǵyn suradym. Halyq jınaǵan qarjynyń jartysy jol shyǵynyna keteıin dep tur, emge jetpeı qalady, biz sol úshin alańdap otyrmyz», - dedi Erbaıan Muhtardyń ákesi Hamıt Aımaǵambetov elordada ótken brıfıng barysynda.

Sonymen qatar sarbazdyń ákesi nemis dárigerleriniń Erbaıandy 2-3 aıdyń ishinde bir qalypqa keltiretinderine kepildik berip otyrǵanyn aıtty. 

«Dárigerler Erbaıannyń aıaǵynan turýyna 80-85% úmit bar dep otyr. Jalpy jaǵdaıy birqalypty, jaman emes, biraq keshe talmasy ustap qaldy, nemis professorlarynan konsýltatsııa alyp otyrmyz», - deıdi ol. 

Buǵan deıin komada bolǵan sarbazdyń ákesi qazir Erbaıannyń densaýlyq jaǵdaıy shetelge aparýǵa jaramaı turǵanyn aıtqan edi. 

Eske sala keteıik, áskerde júrip, múgedek bolyp qalǵan sarbazdy Ulttyq ulannyń qolbasshylyǵy shet elde emdetpekshi. 

Sondaı-aq, Ulttyq ulan bólimshesinde merzimdi áskerı qyzmet atqarǵan Erbaıan Muhtardyń komaǵa túsýine janama aýrýlar sebep bolǵany aıtyldy.