Nemis dárigeri 15 naýqasty qasaqana óltirdi degen kúdikke ilindi

ASTANA. KAZINFORM — Pallıatıvtik kómek kórsetetin nemis dárigerine naýqastardy ólimge ákeletin dári-dármekterdi qoldaný arqyly 15 adamdy óltirdi degen aıyp taǵyldy, dep habarlaıdy BBC. 

2021 jyldyń qyrkúıegi men 2024 jyldyń shildesi aralyǵynda ol 12 áıel men 3 er adamdy óltirgen bolýy múmkin. Alaıda, prokýratýranyń málimetinshe, qurbandar sany budan da kóp bolýy yqtımal.

Germanııa zańyna sáıkes, dárigerdiń aty-jóni jarııalanbaı otyr. Prokýratýranyń málimdeýinshe, ol óz kinásin moıyndamaǵan.

Aıyptalýshy dáriger naýqastaryna olardyń kelisiminsiz anestetık pen mıorelaksant engizgen dep kúdikke ilingen. 

— Mıorelaksant tynys alý bulshyqetterin sal qylyp, birneshe mınýt ishinde adamnyń tynysyn toqtatýǵa jáne ólimge ákelgen, — delingen prokýratýra málimdemesinde.

Kúdikti Germanııanyń birneshe federaldyq jerinde jumys istegen. Kúdik týdyryp otyrǵan máıitterdiń jasy 25 pen 94 jas aralyǵynda.

Sondaı-aq aıypty óz qurbandarynyń ólimin jasyrý úshin páterlerin órtep jibergen bolýy múmkin.

2024 jyldyń shildesinde oǵan bir kúnde eki naýqasty óltirdi degen aıyp taǵyldy. Biri — Berlın ortalyǵynda turatyn 75 jastaǵy er adam, ekinshisi — kórshiles aýdandaǵy 76 jastaǵy áıel.

Prokýratýra dáriger áıeldiń úıin órtemek bolǵanyn, biraq ol áreketi sátsiz aıaqtalǵanyn málimdedi.

Alǵashynda, 2024 jyldyń tamyzynda tutqyndalǵan kezde, ol tek tórt naýqastyń ólimine qatysy bar dep kúdikke ilingen. Alaıda tergeý barysynda basqa da kúdikti ólim jaǵdaılary anyqtalyp, qurbandardyń máıitterin eksgýmatsııalaý josparlanyp otyr.

Prokýratýra kúdiktini ómir boıy medıtsınalyq qyzmetpen aınalysý quqyǵynan aıyryp, aldyn ala saqtyq úshin túrmege qamaýdy talap etip otyr. Qazirgi ýaqytta ol qamaýda.

Buǵan deıin Aýstralııada 15 jastaǵy shved jasóspirimniń jaldamaly kisi óltirý uıymdastyrmaq bolǵany úshin tutqyndalǵany habarlanǵan edi.