Nemis BioNTech kompanııasy mıllıondaǵan shyǵynǵa ushyrady
ASTANA.KAZINFORM — COVID-19 vaktsınasyn jasap shyǵarǵan Germanııadaǵy BioNTech qazirgi tańda iri qarjylyq shyǵynǵa tap bolyp otyr, dep habarlaıdy DW.
Kompanııa 532 mln eýro kóleminde toqsandyq taza shyǵyn jarııalap, Germanııa men Sıngapýrdaǵy keıbir óndiris oryndaryn jabatynyn jáne shyǵyndardy qysqartatynyn habarlady. Sondaı-aq shamamen 2000 qyzmetkerdiń qysqartylý qaýpi bar.
COVID-19 pandemııasy bastalǵan 2020 jyldan keıin BioNTech-ke ondaǵan mıllıard eýro kiris ákelgen. Alaıda keıin vaktsınaǵa suranys azaıyp, tabys aǵyny kúrt tómendegen.
Sarapshylardyń aıtýynsha, kompanııa bir ónimge tym qatty táýeldi bolyp qalǵan, al bıotehnologııa salasyndaǵy joǵary táýekelder men Germanııadaǵy ekonomıkalyq qıyndyqtar jaǵdaıdy kúrdelendirgen. Óndiris kólemi tym tez ulǵaıyp, keıin zaýyttardyń bir bóligi bos turyp qalǵan.
Kompanııanyń negizin qalaýshylar — Ýgýr Shahın men Ózlem Tıýredjı — kompanııa tabysynyń negizgi qozǵaýshy kúshi bolǵan. Olardyń ketýi týraly habardan keıin BioNTech aktsııalary shamamen 18%-ǵa tómendegen.
Qazir kompanııa onkologııalyq aýrýlardy emdeýge arnalǵan mRNQ-terapııalardy damytýǵa nazar aýdaryp otyr. Bristol Myers Squibb kompanııasymen birlesken zertteýler arqyly sút bezi obyry, ókpe obyry jáne basqa da qaterli isik túrlerine qarsy em ázirlenip jatyr.
BioNTech jyl sońyna deıin klınıkalyq synaqtardyń 15 sheshýshi III fazasyn bastaýdy josparlap otyr. Sonymen qatar kompanııa COVID-19 vaktsınasyn Pfizer arqyly óndiriske berip, keı zaýyttardy jabý esebinen 2029 jylǵa qaraı shamamen 500 mln eýro únemdeýdi kózdeıdi.
Aıta ketelik BioNTech-tiń negizin qalaýshylar jańa kompanııaǵa aýysatynyn málimdegen edi.
