Eki dúrkin Olımpıada chempıony Pákistan taýlarynda qaza tapty

ASTANA. KAZINFORM — Nemis bıatlonynyń ańyzyna aınalǵan sportshy Laýra Dalmaıer Pákistannyń taýlarynda qaıtys boldy, dep habarlaıdy DW. 

Onyń menedjerleri 31 jastaǵy sportshynyń qazasyn rastady.

Qaıǵyly oqıǵa 28 shilde kúni Karakorým taý jotasyndaǵy Laıla-Pık shyńynda bolǵan. Eki dúrkin Olımpıada chempıony tas kóshkininiń astynda qalyp, mert bolǵan.

Qutqarýshylar ony eki kún boıy izdegen, alaıda aýa raıynyń qolaısyzdyǵy men jer bederiniń kúrdeliligi izdestirý jumystaryn qıyndatty.

ZDF arnasynyń habarlaýynsha, sońǵy málimetterge sáıkes, Laýra Dalmaıer oqıǵa ornynda birden kóz jumǵan bolýy múmkin.

Sportshynyń denesi taýda qalatyn boldy. Bul — onyń ózi tiri kezinde qabyldaǵan sheshimi. Laýra eger taýda qaza tapsa, al denesin tómenge túsirý tym qaýipti bolsa, onda ózge adamdardyń ómirine qaýip tóndirmeı, sol jerde qaldyrýdy ótingen.

Buǵan deıin Saýd Arabııasynyń «Uıqydaǵy hanzadasy» atanyp ketken hanzada Ál-Valıd ıbn Haled ıbn Talal Ál Saýd 20 jyldyq komadan keıin ómirden ozǵanyn jazǵan edik.