Nemistiń iri kompanııasy halal sertıfıkatyn ıelendi
ASTANA. 27 jeltoqsan. QazAqparat - Germanııanyń arnaıy hımııa ónimderin óndiretin halyqaralyq ónerkásip kompanııalar tobynyń fabrıkalary sharıǵat talaptaryna saı ónim óndiretinin rastaıtyn sertıfıkatqa ıe boldy.
Ol «tahır» (taza) jáne «halal» (ruqsat etilgen) sanattary boıynsha sertıfıkatty ıelendi. Bul týraly muslim.kz saıty jazady.
«Essendegi jáne Dýısbýrgtegi Evonik Industries kompanııalar fabrıkasy taǵam ónerkásibinde, kosmetıkalyq jáne medıtsınalyq ónerkásipte qoldanylatyn kúrdeli efırdi óndiredi. Endigi jerde atalmysh fabrıkanyń ónimderin musylmandar da qoldanýyna bolady. Jeke bas tazalyǵyna arnalǵan zattar men buıymdardy óndirý jelisiniń bas menedjeri Klaýs Iennıdiń aıtýynsha, atalmysh sertıfıkat álemniń jańa naryǵyn baǵyndyrýǵa, kompanııanyń kommertsııalyq múmkindikterin keńeıtýge múmkindik beredi. Evonik jyl saıyn sertıfıkattaýdan ótedi ári osy aralyqta óndiriste qandaı da bir ózgeris oryn alsa, ony mindetti túrde habarlaıtyn bolady» delingen Áziret Sultan meshitiniń resmı saıtynda.
