Nemistiń Dýısbýrg qalasynda ótken «Mahabbat sherýi» atty aktsııa 17 adam úshin ólimmen aıaqtaldy
ASTANA. Shildeniń 26-y. QazAqparat - Nemistiń Dýısbýrg qalasynda ótken «Mahabbat sherýi» atty mýzykalyq festıvaldiń sońynyń apatqa jalǵasýyna baılanysty, mert bolǵandar sany kún ótken saıyn óse túsýde. Sońǵy málimetterge qaraǵanda 17 adam mert bolyp, 80 adam jaraqat alǵan. Al buǵan deıin apat zardabynan opat bolǵandar sany 15 adam, al jaraqat alǵandar 45 adam delinip kelgen bolatyn. Bul jóninde Associated Press habarlaıdy.
Belgili derekkózderiniń aıtýynsha, shara ótip jatqan jerge barar jolda, ıaǵnı temir jol stansasynyń júk poıyzdar turatyn jerasty turaǵynda adamdardy janshý oryn alǵan. Polıtsııanyń málimdeýinshe, munda Eýropanyń barlyq túkpirinen 1,4 mln. adam jınalǵan. Sondyqtan da adamdardyń zardap shekkendigi týraly alǵashqy aqparat alynǵanymen bılik festıvaldi birden toqtatýdan bas tartqan. Óıtkeni, olar adamdardyń munan da kóp zardap shegýi múmkin ekendiginen qoryqqan. Qutqarýshylarǵa da ońaı bolmaǵan. Qalyń kópshiliktiń ortasyn jaryp ótip, zardap shekkenge qol ushyn berý, árıne ońaı bolmaǵan.
«Mahabbat sherýi» » (Love Parade) atty mýzykalyq festıval Germanııada 1989 jyldan beri ótkizilip keledi. Dál osyndaı merekelik shoýlar Tsıýrıh, Akapýlko, San-Frantsısko, Vena, Tel-Avıv, Keıptaýn, Rıo-de-Janeıro, Oslo jáne Býdapesht qalalarynda da ótkizilýde.
