«Nemisti «úrkitken» Shardaraǵa Damý banki damyldaı ala ma?»- respýblıkalyq basylymdarǵa sholý
ASTANA. Aqpannyń 16-sy. /QazAqparat/ - Qazaq aqparat agenttigi respýblıkalyq basylymdarda aqpannyń 16s-y, seısenbi kúni shyqqan ózekti materıaldarǵa sholýdy usynady.
Memleket basshysy Nursultan Nazarbaev Máskeýge jumys sapary barysynda Reseı Federatsııasynyń Prezıdenti Dmıtrıı Medvedevpen jáne Reseı Úkimetiniń Tóraǵasy Vladımır Pýtınmen kezdesýler ótkizdi. Atalǵan taqyrypty arqaý etken maqala «Egemen Qazaqstan» basylymynyń búgingi sanynda «Astana - Máskeý: turaqty baılanys árdaıym bar» degen taqyryppen berilipti. «Reseılik áriptesimen Zavıdovadaǵy, qala syrtyndaǵy rezıdentsııada bolǵan áńgime kezinde ekonomıkalyq yntymaqtastyqty damytýǵa qatysty eki jaqty qarym-qatynas máseleleri, sondaı-aq halyqaralyq kún tártibindegi ózekti máseleler talqylandy. Solardyń arasynda Jeńistiń aldaǵy 65 jyldyǵy taqyryby da sóz boldy. Nursultan Nazarbaev Máskeýge 9 Mamyrdy merekeleýge qatysýǵa shaqyrýy úshin Dmıtrıı Medvedevke alǵys aıtty. Ol Ekinshi jahandyq soǵystyń qorytyndylaryn eshqandaı da tarıhı qaıta qaraý bolmaýǵa tıis dep málimdedi»,- deıdi basylym.
«Egemen Qazaqstan» gazetiniń búgingi sanynda Memlekettik syılyqtyń laýreaty Ánes Saraıdyń «Noǵaılynyń rýhanı ómiri» atty maqalasy jaryq kóripti. Aty aıtyp turǵandaı tarıhtyń tereń qatparyna qaıtalaı úńilgen bul maqalada Noǵaıly Ordasy týraly jańa derekter sóz bolady. « Burynda da shamalaýshy edim, taqyrypty naqty zertteý ústinde Muryn jyraý aýzynan jazylyp alynǵan "Qyrymnyń qyryq batyry" noǵaılynyń saıası-áleýmettik tarıhynyń epostyq nusqasy ekenine ábden kózim jetti. Mine, muraǵattyq-qujattyq, buryn-sońdy atalmysh taqyrypqa jasalǵan barlaýlar men zertteýlerdi dalalyq tarıhnama, shejire, epos-jyr derekterimen baıytqanda óte bir qyzǵylyqty da maǵynaly eńbek bop shyqty»,- deıdi jazýshy.
***
«Bıylǵy qystyń qahary basqany qaıdam, kóshe kezgen kezbelerge ońaı tıgen joq. kún jylyda tal-terektiń túbin panalap, jertólelerde saıran salyp júretin qańǵybastar Astanany aıaz qysa bastaǵannan jym-jylas joǵaldy. «Batyrǵa da jan kerek», bul - olardyń jyldaǵy ádeti. Biraq qyr asyp ketken eshqaıısysy joq, olardyń barar jer, basar taýy bireý-aq. Astana qalasyndaǵy belgili turaqǵy joq adamdarǵa arnalǵan áleýmettik beıimdeý ortalyǵynda dál búgingi kúni 200-ge jýyq qańǵybas turyp jatyr. ... jaqynyraq baryp, ortalyq turǵyndarymen tildesken bizder mundaǵy 200 adamnyń 200 túrli taǵdyry bar ekenine kózimiz jetti...», -dep jazdy «Astana aqshamy» gazetiniń búgingi sany. Taǵdyrdyń tálkegine ushyraǵan jandardyń búgingi jaǵdaıymen tanysqyńyz kelse, basylymnyń búgingi sanyndaǵy «Ómirdiń ógeı pendesi» degen maqalaǵa nazar aýdaryńyz.
«Demografııaǵa «dem salatyndar» kimder bolýy kerek?» osyndaı saýalǵa qurylǵan «Astana aqshamy» gazetindegi kelesi maqala sońǵy jyldary bala týý qarqynynyń báseńdep bara jatqanyn alǵa tartady. «Dabyl qaǵatyn jaıt: elimiz boıynsha balalardyń salmaǵy azaıyp barady. Jyl saıyn bir rettik járdemaqy men bala baǵý demalysynyń qarjysyn qomaqtylaǵanmen, bala týý qarqyny syn kótermeı tur»,-deıdi basylym.
Sondaı-aq atalǵan basylymnyń búgingi sanynda «Aıman apaıdyń araıy» atty maqala jaryq kóripti. Maqalada belgili aqyn Nurǵoja Orazdyń jan jary, qaıratker ustaz Aıman Qojahmetova týraly sóz bolady.
***
«Úkimettiń keshegi otyrysy ádettegisinen ózgesheleý boldy. Aldymen údemeli ındýstrııaldy-ınnovatsııalyq damý baǵdarlamasyn júzege asyrýǵa jaýapty respýblıkalyq basqarý ortalyǵynyń alǵashqy otyrysy ótti. Úkimet basshysy Kárim Másimov atalmysh jobanyń oryndalýy týraly mınıstrlerdiń qysqa-nusqa esebinen keıin ǵana áńgimeniń aýanyn selektorlyq otyrysqa qaraı burdy»,- dep jazady «Alash aınasy» basylymynyń búgingi sany. Otyrystyń egjeı-tegjeıin gazettegi «Nemisti «úrkitken» Shardaraǵa Damý banki damyldaı ala ma?» degen taqyryppen berilgenmaqaladan oqı alasyzdar.
Búginde elimizdegi mektep jasyna deıingi balalar mekemelerimen qamtylý deńgeıi 36,5 paıyzdy quraıdy eken. áli de bolsa, 240 myń búldirshin kezekte «óz balabaqshasyn» kútip tur. Osy oraıda sheteldik tájirıbege súıene otyryp, «Balabaqsha máseleni árbir mekeme janynan balabaqshalar ashý arqyly sheshýge bola ma?» degen suraq týady. Buǵan tanymal adamdarymyz ne deıdi? «Alash aınasy» gazetinniń «Oı-kókpar» aıdarynda «Rýhanııat» partııasynyń jetekshisi Altynshash Jaǵanova men «Aıgólek» jýrnalynyń bas redaktory Qymbat Ábildáqyzy atalǵan taqyryp tóńireginde pikir talastyrypty.
«Alash aınasy» basylymynyń turaqty «DAT» aıdarynda múgedek jandardyń taǵdyry sóz bolypty. «Qoǵamymyzǵa múgedek jandarǵa degen túsinistik, meırim, qaıyrymdylyq jetispeı jatyr. Olar da - qoǵamnyń tolyqqandy múshesi, tolyq quqyqtar men erkindikterge ıe. Sondyqtan da olardy qoǵam ómirine barynsha tartatyn, adamı potentsıalynyń ashylýyna múmkindik beretin qoǵamdyq kózqarastar júıesin qalyptastyrýymyz kerek»,-deıdi «Qazaqstan múgedekter uıymy» odaǵynyń tóraǵasy Álı Amanbaev gazettegi suhbatynda.
