Nemister óz elderimen maqtanýǵa bolatyn jeti sebepti kóldeneń tartty
ASTANA. Jeltoqsannyń 28-i. QazAqparat - Nemisterdiń Bild tabloıdi rojdestvolyq mereke qarsańynda nemisterdi qurmetteýge májbúr etetin, tipti basqa elderdiń qyzyǵýshylyǵyn týǵyzatyn negizgi jeti belgini atady.
Birinshiden, nemister ózderiniń kantsleri Angela Merkeldi maqtan tutýlaryna tolyq negiz bar. Forbes jýrnalynyń nusqasy boıynsha Merkel ǵalamshardaǵy eń yqpaldy áıelder tizimin qatarynan tórt jyl boıy bastap keledi.
Ekinshiden, nemister óndiretin taýarlarynyń sapasy boıynsha kósh bastaýda. «Made in Germany» degen belgi áli kúnge deıin óte joǵary baǵalanady. 2009 jyly GFR eksport boıynsha álemde birinshi oryndy saqtap qaldy. Nemisterdiń avtokontsernderinen basqa GFR-daǵy kóshbasshylyqty, bir qaraǵanda usaq-túıek bolyp kórinetin - plastıkalyq dıýbelder, rozetkalar jáne shtekerler nemese alıýmınıı ydystar shyǵaratyn 1800-ge jýyq kásiporyndar qamtamasyz etedi.
Úshinshiden, nemister eńbek tıimdiligi boıynsha basqa elderden asyp túsedi. 29 kún demalatyndaryna qaramastan GFR azamattary aýrý-syrqaýǵa az ushyraıdy, basqa elderge qaraǵanda 1 saǵattaǵy eńbek ónimdiligi joǵary.
Tórtinshiden, Germanııa taza ındýstrııa ekologııasy salasyndaǵy kóshbasshylardyń birinen bolyp tabylady. Nemis ekonomıkasynyń «jasyl» sektorynda (kún batareıalaryn, jel generatorlaryn salý jáne paıdalaný, bıootyn óndirisi) 1,5 mıllıonǵa jýyq adam eńbek etedi.
Besinshiden, Ekonomıkalyq yntymaqtastyq jáne damý halyqaralyq uıymynyń baǵalaýynsha, densaýlyq saqtaýdyń nemistik júıesi álemdegi eń úzdik dep tanylǵan. 1000 turǵynǵa 1,5 dárigerden jáne 5,7 aýrýhana tósekterinen keledi.
Altynshydan, GFR mádenı ómirdiń eń basty ortalyqtarynyń biri bolyp tabylatynyn statıstıka kórsetip otyr. Elde 150-ge jýyq teatrlar, 133 orkestr jumys isteıdi, al 2009 jyly ótken Frankfýrttaǵy kitap jármeńkesine 100 myń jańa shyǵarma usynyldy, 2009 jylǵy ádebıet salasyndaǵy Nobel syılyǵyn nemis áıeliniń - Gret Mıýllerdiń alǵany óz aldyna.
Jetinshiden, nemister avtobandarymen shyn máninde maqtana alady. Japonııa men Koreıanyń jetekshi avtoóndirýshileri ózderiniń tájirıbelik úlgilerin nemis joldarynda «jelmen jarystyrý» úshin Germanııaǵa ákeledi. Jalpy uzyndyǵy 12500 shaqyrym bolatyn nemis kúrejoldarynyń jartysynda jyldamdyqqa shekteý qoıylmaǵan. Avtobandar barynsha qaýipsiz: shaqyrymǵa shaqqandaǵy adam ólimine ushyratqan jol-kólik oqıǵasynyń sany jaǵynan álemdegi eń tómengi oryndy ıelenedi.
