Nemister Qazaqstanda kún men jel elektr stansalaryn salýǵa nıetti
ASTANA. QazAqparat - 2020 jylǵa deıin Germanııanyń ınvestorlary balamaly energııa salasynda 189 MVt bolatyn birneshe jobany qolǵa alýdy josparlap otyr, dep xabarlaıdy QazAqparat tilshisi.
QR Investıtsııalar jáne damý vıtse-mınıstri Erlan Qaıyrovtyń aıtýynsha, Germanııa prezıdenti Frank-Valter Shtaınmaıerdiń Qazaqstanǵa jasaǵan resmı sapary aıasynda osy eldiń balamaly energetıka salasyndaǵy biraz kompanııalary keldi. "Olar jel men kún energııasy boıynsha jumys isteıdi. Eki jaq ortaq jobalardy iske asyrýǵa múddeli. Qazirgi kezde ol jobalardy naqty qaı jerde ornalastyrý jáne iskerlik baılanystardy qandaı formatta júrgizý máselesi talqylanyp jatyr. Eń bastysy, eki jaq ta áriptestik qarym-qatynasty júrgizýge nıetti. Men dál qazir ol jobalardy jáne ony iske asyratyn kompanııalardy atap bere almaımyn. Bizdiń barlyq bastamalarymyz iske asqanda belgili bolady", - deıdi Qaıyrov.
Aıta keteıik , búgin Astanada Qazaqstan men Germanııa saýda-ekonomıkalyq yntymaqtastyq jónindegi úkimataralyq jumys tobynyń kezekti otyrysy ótti. Sol jerde ortaq jobalardy iske asyrý máselesi qaraldy. Jańa jobalardyń ishinde Jambyl oblysynyń Qordaı aýdanynda salynatyn taý-ken kombınaty da bar .
