Nemis jazýshysy Stefanı Tsveıg dúnıeden ótti
ASTANA. QazAqparat - Nemistiń evreı násildi belgili jazýshysy Stefanı Tsveıg 81 jasynda dúnıeden ótti. Jergilikti BAQ jeksenbi kúni habarlaǵandaı, Tsveıg 25 sáýirde qaıtys bolǵan. Jazýshynyń qaıtys bolýy sebepteri, sondaı-aq ony jerleý ýaqyty men orny ázirge naqtylanbaǵan, dep habarlady ITAR-TASS.
1930 jyldary Tsveıgtiń otbasy natsıster tarapynan qýdalaýdan bas saýǵalap, Kenııaǵa qashýǵa májbúr boldy, Germanııaǵa 1947 jyly ǵana oraldy. Keıinirek óziniń osy kezeńdegi ómiri týraly estelikterin «Eshqaıda Afrıkada» romanynda jazdy. Ǵumyrnamalyq roman Tsveıgti álemge tanymal etti. 2003 jyly romannyń jelisimen osy attas fılm túsirilip, onyń rejısseri Karolına Lınk úzdik sheteldik fılm retinde «Oskar» syılyǵyna ıe boldy.
Sondaı-aq jazýshynyń «Germanııanyń bir jerinde», «Aýyz tolǵan topyraq», «Degenmen armandar Afrıkada qalady» jáne basqa shyǵarmalary bar. Heyne Verlag baspasynyń baǵalaýynsha, onyń romandarynyń jalpy taralymy 7,5 mln. danadan asady. Sońǵy jyldary Tsveıg Maındaǵy Frankfýrtta turdy.
