Nemis sarapshylary otandyq óndiristerdi baǵalaýǵa kiristi

 ASTANA. QazAqparat - Germanııadan kelgen sarapshylar toby «Qazaqstandaǵy óndiristerde ınnovatsııalar baıaý engiziledi» degen aldyn ala qorytyndyǵa kelip otyr. Degenmen, birneshe ortaq jobany iske asyrýǵa múddeli, dep xabarlaıdy QazAqparat tilshisi.

QR Tuńǵysh Prezıdenti janyndaǵy Jas ǵalymdar keńesiniń tóraǵasy Maxmut Tomanovtyń aıtýynsha, ortaq jobalarǵa nemis sarapshylarynyń ózderi tapsyrys berip otyr. «Qazirgi kezde áriptesterimiz ol jobalardyń mán-maǵynasyn aıtpaýǵa ótinish jasady. Ázirshe, ol - qupııa aqparat. Olar úsh jobaǵa tapsyrys berdi. Biz ol jumysty birlesip atqaramyz. Bálkim, ortaq bastamamyzdy Germanııada iske asyrady, ıa bolmasa, Qazaqstanda engizedi. Dál qazir dóp basyp, aıtý qıyn. Alaıda bir nárse anyq, nemis sarapshylary jaıdan-jaı kelmeıdi. Olardyń arǵy jaǵynda iri ınvestıtsııalar jatyr», - deıdi Tomanov.

Qazaqstanǵa kelgen nemis sarapshylarynyń ishinde Fraýngofer atyndaǵy ınstıtýttyń ókilderi bar. Olar avtomatızatsııa, óndiristi basqarý men ınnovatsııalardy zertteýmen aınalysady.

Aıta keteıik, Qazaqstanda búginde ýnıversıtetten kelgen jas mamandar óndiriske uzaq beıimdeledi. «Qazirgi kezde ýnıversıetterdiń barlyǵy derlik ındýstrııaǵa qajet, al, eń bastysy, soǵan saı mamandardy daıyndap jatyr dep aıtýǵa bolmaıdy. Indýstrııanyń ózi naqty bir mamandardy qalasa da, búgingi oqý baǵdarlamalary ondaı qyzmetkerlerdi daıarlaýǵa saı kelmeıdi. Bir sózben aıtqanda, eskirip qalǵan. Osynyń saldarynan óndiriske keletin bakalavr mamany taǵy bes jyldaı beıimdeledi. Demek, tórt jyl oqıdy, bes jylyn taǵy beıimdelýge ketiredi. Sóıtip, baqandaı toǵyz jyldan keıin bir nárseni isteı bastaıdy. Bul - tym uzaq protses. Qazirgi naryq zamany ondaıdy kótermeıdi», - deıdi Tomanov.