Nemis motoshabandozy Almatydaǵy jarystan keıin aýrýhanaǵa túsip qaldy
ALMATY. QazAqparat – Almatyda «Medeý» taý shatqalynda muzdaǵy motojarystan ótken spıdveı boıynsha jeke álem chemponatynyń aqtyq kezeńi aıaqtaldy, dep habarlaıdy QazAqparat tilshisi.
Álem birinshiliginiń almatylyq kezeńine Qazaqstan, Reseı Avstrııa, Germanııa, Nıderland, Shvetsııa, Chehııa men Avstrııadan 18 «muz gladıatory» qatysqan.
Avstrııa, Shvetsııa, Nıderland pen Germanııadan kelgen motoshabandozdar tartysty oıyn kórsetti. Favorıtter nemis shabandozy Iohan Veber men shved Martın Haarahıltýnen, sondaı-aq ákeli-balaly Nıklas pen Stefan Svenssondar arasynda ashyq báseke boldy.
Nemis motoshabandozy Djohan Veberdiń muzdy aınalma joldyń burylysynda avstrııalyq Frants Tsornmen soqtyǵysyp, qulaýy «Medeýdiń» muńdy kórinisine aınaldy. Nemis gladıatoryn birden jedel járdem kóligi alyp ketti.
Jarystyń jaqsy dástúrleriniń biri - jankúıerlerge umytylmas emotsııa syılaý. Kórermender raıderdiń batyldyǵyna qol shapalaqtap, qurmet kórsetti. Qazirgi ýaqytta shabandoz almatylyq emhanalardyń birinde dárigerlerdiń baqylaýynda.
20-aınalymda mototsıklshiler eki ret qulady. Aldymen burylystan shyǵarda mototsıkldi ıgere almaı, Shvetsııanyń motoshabandozy Ove Ledshtrem qulap ketti. Ekinshi jarysta gollandııalyq Djasper Ivemeniń joly bolmady - ol muzdy trassanyń burylysynda laıyqty jyldamdyqpen kele jatyp, mototsıklimen salto jasap, bógeıtin tósenishterge ushyp ketti.
Qýanyshqa oraı, ekeýi de aýyr jaraqat alǵan joq. Djasper tipti qorytyndy baspasóz konferentsııasyna qatysyp, óziniń qulaǵanyn ázilmen jetkizdi.
Jarysta reseılik motoshabandoz Danııl Ivanov eki kúndik jarysta jeńiske jetse, ekinshi orynǵa onyń otandasy Dmıtrıı Homıtsevıch shyqty. Úshtikti reseılik Dmıtrıı Koltakov túıindedi.
Qazaqstandyq raıderler Vladımır Cheblokov, Pavel Nekrassov jáne Sergeı Serov alǵashqy kúnniń jarystary negizinde jaqsy nátıje kórsete almaı, fınalǵa jetpeı, jarys jolynan shyǵyp qaldy.
QR avtomotosport federatsııasynyń prezıdenti Marat Ábiqaev bul jarystyń Qazaqstanda ári qaraı da jalǵasatynyna senim bildirdi.
«Biz keler jyly elimizde spıdveı boıynsha jeke álem chemponatynyń aqtyq kezeńin ótkizý týraly kelisimge qol jetkizdik. Jarysty ótkizý úshin 3 nysan tańdalyp jatyr, olar - «Medeý» muz aıdyny, Almatydaǵy «Sokol» tasjoly, sonymen qatar astanamyz Nur-Sultanda da jarys ótkizý múmkindigi bar», - dep atap ótti qorytyndy baspasóz konferentsııasynda Marat Ábiqaev.
Aıta keteıik, 2020 jylǵy spıdveı boıynsha jeke álem chempıonaty bes fınaldyq kezeńnen turady. Birinshi fınaldy ótkizý Qazaqstanǵa buıyrdy, ekinshisi - Reseıdiń Tolıattı, úshinshisi - reseılik Shadrınsk qalasynda ótedi. Chempıonat Germanııa men Nıderlandta aıaqtalady. Chempıonattyń komandalyq fınaly Germanııa astanasy Berlınde bolady.
