Nemis kompanııasy 12 jastan asqan balalarǵa arnalǵan COVID-19 vaktsınasyn ázirlep jatyr
BRıÝSSELЬ. QazAqparat. – «BioNTech» nemis bıotehnologııalyq kompanııasynyń bas dırektory Ýgýr Shahın kompanııanyń 12 jastan asqan balalarǵa arnalǵan COVID-19 vaktsınasyn daıyndaýdyń sońǵy satysynda ekenin habarlady, dep jazady QazAqparat.
Nemis buqaralyq aqparat quraldaryna bergen suhbatynda ǵalym ázirlengen vaktsına bıylǵy jyldyń maýsym aıynda Eýropada 12-15 jas aralyǵyndaǵy balalarǵa qoljetimdi bolatynyn aıtty. Qazirgi tańda Eýropalyq dári-dármek agenttiginde preparatty maquldaý týraly ótinish daıyndalýda.
Eýropa Odaǵynyń retteýshi organynyń baǵalaýy orta eseppen tórt-alty aptaǵa sozylady deıdi Ý. Shahın.
Nemis ǵalymdarynyń pikirinshe, balalardy vaktsınalaý ujymdyq ımmýnıtetti alýda jáne COVID-19 pandemııasyn toqtatýda mańyzdy qadam retinde qarastyrylady.
Kelesi oqý jylyna deıin eresek balalardy vaktsınalaý, balalaryn úıde oqytýdyń qolaısyzdyǵyna tap bolǵan ata-analarǵa qysymdy tómendetedi.
«Balalardyń qalypty mektep ómirine qaıta oralýyna jáne olardyń otbasymen jáne dostarymen kezdesýine múmkindik berý óte mańyzdy», – dedi Ý.Shahın.
«BioNTech» bıotehnologııalyq kompanııasy jáne onyń seriktesi «Pfizer» Amerıka Qurama Shtattarynda 12 jastan 15 jasqa deıingi balalarǵa vaktsınaǵa ruqsat alýǵa ótinish berdi. 16 jastan asqan jasóspirimder eresekterge arnalǵan eki ınektsııalyq vaktsınany qabyldaı alady.
2021 jyldyń naýryzynda óndirýshiler 12-15 jas aralyǵyndaǵy balalarǵa arnalǵan vaktsınanyń klınıkalyq synaqtarynyń sońǵy kezeńi aýrýdyń aldyn alýda 100% tıimdi ekenin kórsetti.
Eresekterge arnalǵan Pfizer vaktsınasynyń qazirgi nusqasy mınýs 70 gradýs temperatýrada saqtalýy kerek. Alaıda Pfizer ótken aptada standartty muzdatqyshta saqtaýǵa bolatyn «Comirnaty»-diń jańa nusqasyn josparlap otyrǵanyn aıtty.
