Nemis fýtbolshysy Mesýt Ózıl sporttan ketti

ASTANA. QazAqparat - Nemis fýtbolshysy Mesýt Ózıl sporttaǵy mansabyn aıaqtady. Ol bul jaıynda áleýmettik jelidegi paraqshasynda málim etti, dep habarlaıdy QazAqparat.

«Biraz oılana kele kásibı fýtboldan ketý jóninde sheshim qabyldadym. 17 jyl boıy fýtbol oınadym jáne osyndaı múmkindik úshin taǵdyryma rızamyn. Biraq sońǵy aılarda birneshe márte jaraqat aldym, soǵan qaraǵanda úlken fýtbol arenasynan ketetin ýaqyt kelgeni anyq. Bul umytylmas sátter men emotsııaǵa toly tańǵajaıyp saıahat boldy. Ózim oınaǵan Shalke-04, Verder Bremen, Real Madrıd, Arsenal, Fenerbahche, Bashakshehır klýbtaryna alǵys aıtqym keledi. Sondaı-aq meni qoldaǵan jattyqtyrýshylar men jan joldasyma aınalǵan komandalastarǵa rahmet. Otbasy múshelerime jáne eń jaqyn dostaryma erekshe rızashylyǵymdy bildiremin... Endi áıelim Amınamen jáne eki qyzym Eda jáne Elamen birge keleshektiń maǵan tartatyn syıyn asyǵa kútemin. Kelesi kezdeskenshe!» dep jazdy Ózıl Instagram paraqshasynda.

Mesýt Ózıl - nemis fýtbolshysy, shabýyldaýshy jartylaı qorǵaýshy. Germanııa quramasynda oınap júrgende 2014 jyly álem chempıony atandy. Jasy 34-te.