Nemis azamaty óz basynan oq taýyp aldy
ASTANA. Tamyzdyń 26-sy. QazAqparat - Herne (Herne) qalasyndaǵy nemis dárigerleri 35 jastaǵy nemis azamatynyń basynan 22-inshi kalıbrli oqty alyp shyqty. Ol óziniń basynda oqtyń barlyǵynan habarsyz bolyp, birneshe jyl jaıbaraqat ómir súrgen eken, dep habarlaıdy FOCUS. Oqtyń tabylýy da kezdeısoq boldy. Er azamat óziniń jelkesinde paıda bolǵan isikti emdetý úshin dárigerlerge qaralǵanda, olar ol jerden oqty taýyp aldy.
Polıtsııa tergeý amaldaryn bastap ketti. Aldan ala aqparat boıynsha, er azamattyń basyna oq 2004 nemese 2005 jyldyń jańa jyl túninde tıgen. Zardap shekken azamattyń aıtýynsha, birneshe jyl buryn - Jańa jyl qarsańynda ol Hern qalasynyń ortalyǵynda kele jatyp, jelkesine tıgen soqqyny sezingenmen, oǵan mán asa mán bermegen eken.
Polıtsııanyń joramaldaýynsha, atalmysh azamatqa qastandyq jasalmaǵan, ol tek jańa jyldyń kelýin toılap júrgenderdiń áýege atqan shaǵyn kalıbrli oǵynyń kezdeısoq qurbany bolýy múmkin. Er azamattyń tiri qalýyna oqtyń bas terisi men bas súıektiń arasynda keptelip qalýy sebep bolǵan syńaıly. Birneshe jyldan keıin oq tıgen jer syzdap aýyryp, osynyń saldarynan ǵana ol dárigerge qaralǵan eken. Bas súıekten alynǵan oq saraptamaǵa jiberildi. Krımınalıster qarý markasy men onyń qojaıynyn anyqtaýǵa múmkindik bolatynyna senim bildirip otyr.
