Nemeresin qutqarmaq bolǵan áıel «polıtseıge» 400 myń aýdarǵan
PETROPAVL. QazAqparat – Soltústik Qazaqstan oblysynda polıtseıler zeınetker áıeldi telefonmen aldap, onyń 400 myń teńgesin oljalaǵan alaıaqty izdep jatyr, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, tártip saqshylaryna Maǵjan Jumabaev aýdanynyń 60 jastaǵy turǵyny júgingen.
Zardap shegýshiniń aıtýynsha, oǵan telefonmen belgisiz bireý habarlasyp, ózin quqyq qorǵaý organdarynyń qyzmetkeri retinde tanystyrǵan. Sondaı-aq áıelge nemeresiniń keleńsiz jaǵdaıǵa tap bolǵanyn, bul máseleni «sheshý» úshin 400 myń teńge tóleýdiń qajet ekenin aıtqan. Esi shyqqan áıel qaskóıdiń barlyq talaptaryn oryndap, kórsetilgen shotqa aqsha aýdarǵan. Tek keıin óziniń alaıaqqa jem bolǵanyn bilipti.
Atalǵan derek «Alaıaqtyq» baby boıynsha Sotqa deıingi tergep-tekserýdiń biryńǵaı tizilimine engizildi. Jedel-izdestirý is-sharalary júrgizilip jatyr.
«Áıel adamnyń nemeresine habarlasyp, mán-jaıdy suramaǵany túsiniksiz. Árıne, qylmysker psıhologııalyq qysym kórsetken. Alaıda, mundaıda abdyramaı, kómek qajet degen týysyna habarlasyp, mán-jaıdy óz aýzynan bilgen jón. Telefon alaıaqtyǵy ótken jyldary beleń alǵan. Endi qaskóıler ınternet-keńistikke aýysqan», - deıdi SQO PD bastyǵynyń orynbasary Rýslan Nazarov.
Polıtseılerdiń aıtýynsha, ınternet-alaıaqtar kóbine ózderin banktiń qaýipsizdik qyzmeti ókili retinde tanystyrady. Keıin onyń shotynan bireý aqsha sheship jatqandyǵyn aıtyp qorqytyp, tez arada bank kartasynyń kodyn aıtýdy talap etedi. Osylaısha qylmysker ınternet-bankıng arqyly shottaǵy aqshany qoldy etedi. Búgingi kúni bul – kıberqylmystyń keń taraǵan ádisi.
Jalpy SQO polıtseıleri jyl basynan 46 ınternet-alaıaqtyqty ashty.
