Nelikten polıtsııaǵa túsken árbir aryz birden qylmystyq iske aınalmaıdy
ASTANA. KAZINFORM — Abaı oblysy Polıtsııa departamenti azamattardyń árbir ótinishi boıynsha qylmystyq is birden qozǵala bermeıtinin málimdedi. Aldymen oqıǵanyń mán-jaıy jan-jaqty tekserilip, quqyqtyq baǵa berilýi tıis.
Kóptegen azamat ótinish bergennen keıin qylmystyq is birden tirkelip, tergeý sol sátte dereý bastalýy tıis dep oılaıdy. Alaıda polıtsııaǵa aryzdyń túsýi qylmystyq protsestiń avtomatty túrde bastalǵanyn bildirmeıdi.
— Polıtsııaǵa kelip túsken árbir ótinish mindetti túrde tirkelip, qaralady. Sonymen qatar protsessýaldyq sheshim qabyldanǵanǵa deıin oqıǵanyń barlyq mán-jaıyn anyqtap, árekette qylmystyq quqyqbuzýshylyq belgileriniń bar-joǵyn belgileý qajet, — deıdi tártip saqshylary.
Polıtsııanyń túsindirýinshe, syrttaı uqsas kórinetin jaǵdaılardyń quqyqtyq tabıǵaty ártúrli bolýy múmkin. Bir jaǵdaıda qylmystyq quqyqbuzýshylyq belgileri anyqtalsa, ekinshi jaǵdaıda ákimshilik quqyqbuzýshylyq nemese azamattyq-quqyqtyq daý bolýy yqtımal. Máselen, qaryzǵa berilgen aqshany qaıtarý týraly daý azamattyq-quqyqtyq qatynastarǵa jatýy múmkin. Alaıda eger adamnyń bastapqyda bótenniń múlkin aldaý jolymen ıemdený nıeti bolǵany anyqtalsa, onyń áreketinen alaıaqtyq belgileri kórinýi múmkin.
Sondaı-aq tanys adamdar arasyndaǵy janjal bir jaǵdaıda turmystyq kıkiljiń retinde baǵalansa, ekinshi jaǵdaıda qasaqana densaýlyqqa zııan keltirý, qorqytý nemese bopsalaý belgilerin qamtýy múmkin. Sondyqtan polıtsııa qyzmetkerleri aryz ıesinen, oqıǵaǵa qatysy bar adamdardan jáne kýálardan jaýap alady, qujattardy, beınebaqylaý kameralarynyń jazbalaryn, hat almasýlardy, aqsha aýdarymdary týraly málimetterdi zerdeleıdi. Qajet bolǵan jaǵdaıda saraptamalar taǵaıyndalyp, sheshim qabyldaýǵa mańyzy bar ózge de materıaldar suratylady.
Qazirgi tańda dáleldemelerdiń edáýir bóligi tsıfrlyq ortada saqtalady. Messendjerlerdegi hat almasýlar, bank aýdarymdary, mobıldi qurylǵylardaǵy derekter, aýdıo jáne beınejazbalar oqıǵanyń tolyq kórinisin qalpyna keltirýge kómektesedi. Alaıda mundaı málimetterdi alý, zertteý jáne protsessýaldyq tártippen bekitý belgili bir ýaqytty talap etedi.
Tergeý qyzmetkerleriniń aıtýynsha, tekserýdiń maqsaty — protsesti sozý emes, naqty faktiler men dálelderge súıene otyryp, zańdy ári negizdi sheshim qabyldaý.
— Jetkilikti negizdersiz asyǵys sheshim qabyldaý oqıǵany durys emes quqyqtyq saralaýǵa, protsess qatysýshylarynyń quqyqtarynyń buzylýyna jáne negizsiz qorytyndylarǵa ákelýi múmkin, — dep eskertti vedomstvo.
Polıtsııa azamattarǵa ótinish bergen kezde oqıǵanyń mán-jaıyn barynsha tolyq baıandap, qolda bar materıaldardy qosa usynýǵa keńes beredi. Atap aıtqanda, hat almasýlar, skrınshottar, túbirtekter, chek-kvıtantsııalar, aýdıo jáne beınejazbalar, medıtsınalyq qujattar, sondaı-aq yqtımal kýálar týraly málimetter quqyqtyq baǵa berýdi jedeldetýge jáne naqtylaýǵa múmkindik beredi.
— Osylaısha, qylmystyq protsestiń birden bastalmaýy polıtsııa áreketsizdigin bildirmeıdi. Bul — oqıǵanyń barlyq mán-jaıyn jan-jaqty zertteýge, durys quqyqtyq baǵa berýge jáne zańdy, negizdi protsessýaldyq sheshim qabyldaýǵa baǵyttalǵan qajetti kezeń, — dep túıindedi Abaı oblystyq PD.
Osyǵan deıin Ulytaýda kásiporyn dırektory tergeýshige para bermek bolǵan sátte ustalǵanyn jazǵan edik.
