Nelikten Otbasy bank Astanadaǵy «Dýman» qonaqúıin satyp aldy

ASTANA. KAZINFORM — «Báıterek» UBH» AQ basqarma tóraǵasy Rýstam Qaraǵoıshın Úkimettegi brıfıngte Otbasy bank Astanadaǵy «Dýman» qonaq úıin ne úshin satyp alǵanyn túsindirdi.

Onyń aıtýynsha, «Dýman» qonaq úıi — memleketke qaıtarylǵan aktıv.

— Osy aktıvti iske asyrý saıasaty aıasynda ony aýktsıonda satýǵa birneshe talpynys jasaldy, biraq usynylǵan baǵa bizdi qanaǵattandyrmady. Bul ǵımarat kólemi men keıbir parametrleri boıynsha Otbasy banktiń kóshýine dál sáıkes keldi, sebebi banktiń ózine arnaıy múmkindikter qajet edi. Sondyqtan bul nysan bizge qolaıly boldy, — dep túsindirdi Qaraǵoıshın.

Basqarma tóraǵasynyń sózinshe, Otbasy bank zań sheńberinde konkýrsqa tolyqqandy qatysyp, ǵımaratty satyp alǵan jáne qarajatty memleketke aýdarǵan.

— Biz óz esepterimizdi júrgizdik, ashyq derekkózderge qarasańyzdar, kóre alasyzdar. Jańa ǵımarat salý áldeqaıda qymbatqa túsetin edi, al bul nysannyń balanstyq quny mámile úshin óte qolaıly boldy, — dedi holdıng basshysy.

Aıta keteıik, buǵan deıin elde zańsyz shyǵarylǵan aktıvterdi qaıtarý tetigi kúsheıtilgeni jóninde jazǵanbyz.