Nelikten koreıler uzaq ómir súredi: dástúrli medıtsınanyń qupııalary
Koreıada egde jastaǵylardyń jas urpaqtan kem túspeı, belsendi ómir saltyn ustanatynyna eriksiz tańdanasyz. Olardyń ortasha ómir súrý uzaqtyǵy búginde 80 jyldan asady. Eldiń Áleýmettik qamsyzdandyrý mınıstrligi uzaq ómir súrý kórsetkishi 100 jylǵa jetedi dep boljap otyr. Kórsetkishti ósirýge qandaı faktorlar áser etedi? Bul týraly Kazinform tilshisi dástúrli Koreı medıtsınasy ınstıtýtynyń bas menedjeri Baık ıÝsangpen áńgimelesken edi.
Baık ıÝsangtyń aıtýynsha, koreılerdiń densaýlyǵyna eń aldymen qorshaǵan orta áser etedi.
«Qorshaǵan ortanyń taza bolýy adamnyń densaýlyǵy úshin mańyzdy. Koreıada taza sý, jaǵymdy klımat jáne qolaıly atmosfera uzaq ómir súrýge eń qajetti faktor. Taǵy bir mańyzdy aspekt - taýly aımaqtyń bolýy. Dástúrli medıtsınada qoldanylatyn kóptegen dárilik ósimdik pen shóp taýlarda ósedi. Koreıler olardy erteden qoldanyp keledi jáne tamaqqa da qosady», - deıdi ınstıtýttyń bas menedjeri.
Maman kelesi faktordyń tamaqtanýmen baılanysty ekenin aıtty. Ettiń ornyna koreıler dıetalyq dándi daqyldar, ósimdikter men kókónisterdi kóp jeıdi.
«Koreıa, Qytaı jáne Japonııa dástúrli medıtsınamen aınalysady. Biraq ár elde ózgeshe. Qytaı men Japonııa belgili bir aýrýdy joıýǵa nazar aýdarady. Koreı dástúrli medıtsınasy ımmýnıtetti, deneniń jalpy energııasyn saqtap, nyǵaıtýdy ustanady. Bul ásirese emdeý ádisterinde aıqyn kórinedi. Bizde aýrýlarǵa tıimdi qarsy turý úshin energııany jaqsartýǵa basa nazar aýdarylady», - dep túsindirdi Baık ıÝsang.
Koreıada aýrýlardyń aldyn alý jáne olardy dástúrli jolmen emdeý alǵa qoıylǵan. Ol úshin arnaıy vıtamınder bar.
«Vıtamınderdiń paıdasy mol jáne aıasy keń. Ony sýyq tıgende nemese asqazan-ishek joldarynyń problemalary bolǵanda qoldanady. Sondaı-aq bulshyqettiń aýrýy, as qorytý problemalary jáne júıke júıesiniń aýrýlary úshin de paıdaly. Odan bólek, vıtamındi deneni aýyr sezingende ishý kerek. Sol sııaqty arnaıy arnaıy preparattar bar. Olar energııany qalpyna keltirý úshin arnaıy jasalǵan. Ásirese tábettiń nasharlyǵynan nemese as qorytý problemasy bolǵan jáne sharshaý kezinde ishedi. Dári-dármek sýyq tııý, joǵary temperatýra, bas aýrǵanda jáne jótelmen kúreste óte tıimdi. Mańyzdysy, olar belgili bir belgilerdi jeńildetýge ǵana emes, sonymen qatar jalpy aýrýdy, álsizdikti jáne búkil deneniń aýyrsynýyn emdeýge arnalǵan», - dep túsindirdi sarapshy.
Atalǵan dári-dármek dárigerdiń nusqaýymen retseptimen beriledi.
«Densaýlyqty jaqsartýǵa jáne energııany qalpyna keltirýge arnalǵan mundaı dári-dármekter ár adamnyń jeke erekshelikterin eskere otyryp, birneshe nusqada usynylady. Kásibı medıtsınalyq zertteýlerden alynǵan bul ónimder álemdik naryqtarǵa da eksporttalady», - dep tolyqtyrdy ınstıtýt ókili.
Dástúrli Koreı medıtsınasy ınstıtýty - Koreıanyń Áleýmettik qamsyzdandyrý mınıstrligi janynan qurylǵan qoǵamdyq mekeme. Onyń mindetine eldegi medıtsınalyq salany jalpy damytý, medıtsınalyq ónerkásipti ilgeriletý jáne eksporttaý, shetelden patsıentterdi tartý kiredi. Sonymen qatar ınstıtýt koreı medıtsınasyn zamanaýı jańartýmen aınalysady.
