Nelikten qoǵamdyq oryndarda bet-álpetti jasyrýǵa bolmaıdy
ASTANA. KAZINFORM – Polıtsııa túsindirý jumystaryn júrgizip jatyr, - dep jazdy Polisia.kz.

Polıtseıler azamattardy qoǵamdyq oryndarda adamnyń túr-sıpatyn tanýǵa kedergi keltiretin kıimderdi kııýge tyıym salýdy kózdeıtin zańnamadaǵy ózgerister týraly aqparattandyrý jumystaryn bastady.
Zańdaǵy jańa norma 12 shildeden bastap kúshine endi.
— Zańnamaǵa engizilgen ózgeristerdiń basty maqsaty – azamattardyń quqyqtary men bostandyqtaryn, sonyń ishinde dinı senim bostandyǵyn shektemeı, qoǵamdyq qaýipsizdikti qamtamasyz etý, adamdardyń tulǵasyn anyqtaý jáne qoǵamdyq tártipti saqtaý, – dep túsindiredi tártip saqshylary.
Ýchaskelik ınspektorlardyń aıtýynsha, tyıym adamnyń bet-júzin tolyqtaı jaýyp, tulǵasyn anyqtaýǵa kedergi keltiretin kıim túrlerine qatysty. Mysaly betperde, nıkab sııaqty kıimder.
Al bet-júzdi jappaıtyn hıdjab, sheıla, hımar, al-amıra sekildi kıimderge bul normanyń qatysy joq. Bul tyıym aýa raıynyń jaǵdaıyna, medıtsınalyq kórsetkishterge baılanysty qoldanylatyn kıimderge qatysty emes. Sondaı-aq bul norma Qazaqstan Respýblıkasynyń zań talaptaryn oryndaý, qyzmettik (laýazymdyq, eńbek) mindetterdi oryndaý, azamattyq qorǵaý, sondaı-aq sporttyq, sporttyq-buqaralyq jáne mádenı-buqaralyq is-sharalarǵa qatysatyn adamdarǵa qoldanylmaıdy.
Sondaı-aq ýchaskelik polıtsııa ınspektorlary túsindirý jumysy aıasynda azamattarǵa ózge quqyq buzýshylyqtar men qylmystardyń aldyn alý sharalary týraly aıtty. Atap aıtqanda, polıtseıler ınternet-alaıaqtardyń aldaý tásilderi jóninde aqparat berip, mundaı aılaǵa kóbine adamdardyń qalaı tap bolatynyn túsindirdi.
Aıta keteıik, Shveıtsarııada paranja men nıkab kııýge tyıym salyndy.