Nelikten qazaqstandyq nómirlerden alaıaqtar qońyraý shalýdy jalǵastyryp jatyr
ASTANA. KAZINFORM — Májilis depýtaty Ashat Raqymjanov halyqty alaıaqtardan qorǵaý máselesin kóterdi.
Aıta keteıik, búgin Májilistiń jalpy otyrysynda bank qyzmeti týraly jańa zań jobasy qaralyp jatyr.
- Elimizdiń halqy kún saıyn qarapaıym telefon arqyly alaıaqtardyń qurbanyna aınalyp jatyr. Jaqynda ótken Úkimet saǵatynda Іshki ister mınıstrligi bıylǵy toǵyz aıda 67 mln osyndaı telefon qońyraýy buǵattalǵanyn habarlady. Bul rette bir adamǵa orta eseppen úsh-tórt ret qońyraý shalynady eken. Osy jazda uıaly baılanys operatorlaryna belgili bir jaýapkershilikter júkteıtin birqatar túzetýler qabyldandy, onyń ishinde SIM-kartany tirkeý kezinde bıometrııalyq rastaý bar. Birinshiden, qazir ruqsat etilmegen trafıkti buǵattaý jáne SIM kartany tirkeý úshin bıometrııalyq tekserýdi engizý boıynsha qandaı jumystar atqarylyp jatyr? Nelikten qazaqstandyq nómirlerden alaıaqtar qońyraý shalýdy jalǵastyryp jatyr? Ulttyq bankke qoıatyn ekinshi suraǵym bar. Antıfrod ortalyǵy aıasynda alaıaqtyq operatsııalardy anyqtaý jáne azaıtý boıynsha qandaı jumystar atqarylyp otyr?, - dep surady Ashat Raqymjanov Májilistiń jalpy otyrysynda.
Bul suraqtarǵa jaýap berý kezinde Jasandy ıntellekt jáne tsıfrlyq damý vıtse-mınıstri Rostıslav Konıashkın alaıaqtyq áreketter aıasynda jeke adamdarǵa baǵyttalǵan qońyraýlar negizinen áleýmettik jeliler men WhatsApp jáne Telegram sııaqty jedel habar almasý qosymshalary arqyly jasalatynyn aıtty.
- Bul turǵyda SIM-kartasyz eseptik jazbany tirkeýge bolady. Al trafıkti buǵattaý men bıometrııalyq sáıkestendirýdi júzege asyrýǵa qatysty uıaly baılanys operatorlarynyń bıometrıkany engizý erejeleri qabyldandy. Bul quraldar qazir iske asyrylyp jatyr. Telefon nómiri kimge tıesili ekenin rastaı otyryp, naqty adamdarǵa tirkelgen SIM-kartalar sany azaıady dep oılaımyz. Sonymen qatar, Májilistegi jumys toby aıasynda zań jobasyn boıynsha qajet usynystardy qarastyrýǵa daıynbyz, - dedi vıtse-mınıstr.
Óz kezeginde QR Ulttyq banki tóraǵasynyń orynbasary Berik Sholpanqulov shildede qabyldanǵan túzetýler aıasynda uıaly baılanys operatorlary 2026 jyldyń 2 qańtarynan bastap Antıfrod ortalyǵy aıasynda qyzmet kórsetetinin aıtty.
- Olar avtomatty rejımde alaıaqtyq áreketter týraly aqparat almasýdy ornatady. Árıne, jaýapkershilikti arttyrýdyń negizgi máselesi aıasynda jańa usynystardy qarastyrýǵa daıynbyz, - dedi UB ókili.
Eske salsaq, byltyr tamyz aıynda Ulttyq bank alaıaqtyqqa tán tranzaktsııalar týraly derek almasatyn Antıfrod ortalyqty iske qosty.