Nelikten elimizde kólikterge LED-shamdardy salýǵa tyıym salynǵan

ASTANA. KAZINFORM — Qazaqstanda zańsyz qaıta jabdyqtalǵan jaryq qurylǵylary bar avtokólikterdi paıdalanýǵa tyıym salynǵan, dep habarlaıdy Abaı oblysy PD baspasóz qyzmeti.

Vedomstvo málimetinshe, bul ereje, ásirese, ornatý kezinde talaptar men standarttar saqtalmaǵan LED-shamdarǵa qatysty.

Nelikten bul qaýipti?

• Qarsy baǵyttaǵy júrgizýshilerdi shaǵylystyrady — durys baǵyttalmaǵan jaryq túnde basqa júrgizýshilerdiń kózin shaǵylystyryp, qaýip týdyrady.
• Jol-kólik oqıǵasyna sebep bolýy múmkin — apattar men jaıaý júrginshilerdi qaǵyp ketý qaýpin arttyrady.
• Kólik paıdalanýdan shettetilip qalýy múmkin — kólikti ýaqytsha aıyp turaǵyna qoıýǵa deıin aparýy yqtımal.

Zań ne deıdi?

— Kóliktiń qaýipsizdigine qatysty kez kelgen qurylymdyq ózgeris kelisilip, tirkelýi kerek. LED-shamdardy óz betimen ornatý nemese faralardy ózgertý — zańsyz qaıta jabdyqtaý bolyp sanalady, — dep eskertti polıtsııa departamenti.

Bul úshin QR ÁQBtK-niń 590-baby boıynsha ákimshilik jaýapkershilik qarastyrylǵan: 

•aıyppul,

•zań buzýshylyqty joıý talap etiledi,

•kólik aıyp turaǵyna jiberilýi múmkin.

Qashan LED-shamdar qoldanýǵa ruqsat etiledi?

Eger:

•kólik zaýyttan LED-jaryqpen shyqsa, 

•ornatylǵan shamdar sertıfıkattalǵan jáne óndirýshi belgilegen talaptarǵa saı bolsa,

•qaıta jabdyqtaý arnaıy saraptamadan ótip, polıtsııa organdarynda tirkelse.

Júrgizýshilerge keńes

•Qaýip pen shyǵynǵa urynbaý úshin ruqsat etilmegen shamdardy ornatpańyz.

•Eger jaryqty jaqsartqyńyz kelse — tek sertıfıkattalǵan, ruqsat etilgen sheshimderdi qoldanyńyz.

•Inspektor toqtatqanda, zańsyz ornatylǵan shamdardy alyp tastaý men hattama jasaýǵa tolyq quqyly.

— Másele LED tehnologııasynda emes, ony óz betimen, sertıfıkatsyz ornatý — joldaǵy qaýipsizdikke qater tóndirip, zań buzýshylyq bolyp sanalady, — dep túsindirdi oblystyq polıtsııa departamenti.

Buǵan deıin SQO-da qylmystyq topqa qamqorlyq jasaǵan polıtsııa maıory sottalǵanyn jazǵanbyz.